اسلام آباد کے معروف ایچ نائن اتوار بازار کو فائر سیفٹی کے ضروری انتظامات نہ ہونے کے باعث بند کر دیا گیا ہے۔ انتظامیہ کے اس اقدام کے خلاف دکانداروں نے شدید احتجاج کرتے ہوئے اتوار بازار کو فوری طور پر دوبارہ کھولنے کا مطالبہ کیا ہے۔
میڈیا رپورٹ کے مطابق بازار کی اس اچانک بندش کے خلاف 200 سے 250 دکانداروں نے بازار کے باہر باقاعدہ دھرنا دیا اور سی ڈی اے (کپیٹل ڈویلپمنٹ اتھارٹی) کے خلاف شدید نعرے بازی کی ہے۔ دکانداروں کا دعویٰ ہے کہ وہ بازار میں فائر سیفٹی اور حفاظتی انتظامات پر پہلے ہی کروڑوں روپے خرچ کر چکے ہیں۔
یہ بھی پڑھیں: مسلسل 25 منٹ ایک جگہ بیٹھنا بھی دل کے لیے خطرناک ہو سکتا ہے، تحقیق
کاروبار کی تباہی اور شہریوں کی مشکلات:
اتوار بازار مکمل طور پر بند ہونے سے جہاں ایک طرف سینکڑوں دکانداروں کا روزگار اور کاروبار بری طرح متاثر ہوا ہے، وہاں دوسری جانب عام شہری بھی سستے داموں اشیائے ضروریہ کی خریداری سے محروم ہو گئے ہیں۔
دکانداروں کا کہنا ہے کہ بازار کی بندش سے ان کا شدید مالی نقصان ہو رہا ہے، لہٰذا متعلقہ حکام کو چاہیے کہ وہ فوری طور پر معاملے کا حل نکالیں اور بازار کو دوبارہ کھولنے کے احکامات جاری کریں۔
اسلام آباد کے سنڈے بازاروں کی بندش کے خلاف ایچ نائن بازار کے اسٹال ہولڈرز سراپا احتجاج، سی ڈی اے انتظامیہ کے خلاف نعرے بازی۔ مظاہرین کا کہنا ہے کہ فائر سیفٹی یقینی بنائی جائے، مگر پورا بازار بند کرکے ہزاروں افراد کا روزگار ختم کرنا کہاں کا انصاف ہے؟ https://t.co/oNJxNfUMHU
— Abdul Rauf Bazmi (@RaufBazmi) October 18, 2026
