اسلام آباد :جولٹا الیکٹرک نے پاکستان کی آٹوموبائل مارکیٹ میں ایک اور اہم پیشرفت کرتے ہوئے نئی الیکٹرک موٹر سائیکل JE-125L متعارف کرا دی ہے۔
کمپنی کی جانب سے اس جدید الیکٹرک بائیک کی پُرتکلف قیمت 3 لاکھ 29 ہزار 900 روپے مقرر کی گئی ہے، جسے روایتی 125 سی سی بائیک کے ڈیزائن اور جدید ترین الیکٹرک ٹیکنالوجی کا شاندار امتزاج قرار دیا جا رہا ہے۔
موٹر سائیکل کی بیٹری، رفتار اور مائلیج:
جولٹا JE-125L میں طاقتور 2,000 واٹ کی الیکٹرک موٹر نصب کی گئی ہے، جسے چلانے کے لیے 60 وولٹ اور 50 ایمپیئر آور (Ah) کی جدید LiFePO4 بیٹری فراہم کی گئی ہے۔
کمپنی کے مطابق یہ الیکٹرک موٹر سائیکل ایک بار مکمل چارج ہونے پر شاندار 100 سے 120 کلومیٹر تک کا طویل سفر طے کرنے کی صلاحیت رکھتی ہے، جبکہ اس کی زیادہ سے زیادہ رفتار 80 کلومیٹر فی گھنٹہ تک جاتی ہے۔
یہ بھی پڑھیں: اوکلا نے پاک آٹو شو 2026 میں نئی الیکٹرک موٹر سائیکلیں اور اسکوٹرز متعارف کرا دیے
جدید فیچرز اور روایتی ڈیزائن:
اس نئی الیکٹرک بائیک کے اگلے اور پچھلے دونوں پہیوں میں سکیورٹی اور بہترین بریکنگ کے لیے ڈسک بریکس اور دیدہ زیب الائے رم فراہم کیے گئے ہیں۔ اس کے علاوہ JE-125L میں صارفین کی آسانی کے لیے این ایف سی (NFC)، کروز کنٹرول، ریورس گیئر اور کی لیس آپریشن جیسی جدید سہولیات بھی شامل کی گئی ہیں۔
روایتی اسکوٹر نما ڈیزائن کے برعکس JE-125L کو باقاعدہ ایک روایتی موٹر سائیکل کی شکل میں تیار کیا گیا ہے، تاکہ عام 125 سی سی موٹر سائیکل استعمال کرنے والے صارفین کے لیے اس کی سواری، توازن اور نشست کا انداز مکمل طور پر مانوس اور آرام دہ رہے۔
جولٹا کا یہ نیا ماڈل اپنی طاقتور موٹر، بہترین رینج اور روایتی موٹر سائیکل کے خدوخال کی بدولت پاکستانی مارکیٹ میں الیکٹرک دو پہیہ گاڑیوں کے شعبے میں صارفین کو ایک بہترین اور ماحول دوست متبادل فراہم کرتا ہے۔
