لاہور: آزاد جموں و کشمیر کے نومنتخب وزیراعظم افتخار گیلانی نے لاہور آمد کے موقع پر جاتی امرا میں مسلم لیگ (ن) کے صدر میاں محمد نواز شریف اور سینئر قیادت سے اہم ملاقات کی ہے۔ اس موقع پر وزیراعظم پاکستان میاں شہباز شریف اور وزیراعلیٰ پنجاب مریم نواز بھی اجلاس میں شریک تھیں، جبکہ آزاد کشمیر قانون ساز اسمبلی کے سپیکر چوہدری طارق فاروق اور رکن اسمبلی عبدالرحمان آرائیں بھی ملاقات میں موجود تھے۔ مسلم لیگ (ن) کی مرکزی قیادت نے افتخار گیلانی کو مسندِ اقتدار سنبھالنے پر مبارکباد پیش کی اور نئی حکومت کے لیے نیک خواہشات کا اظہار کیا۔
عوامی توقعات پر پورا اترنے اور ترقیاتی ایجنڈے کا عزم:
ملاقات کے دوران نومنتخب وزیراعظم افتخار گیلانی نے وزارتِ عظمیٰ کے لیے نامزدگی پر مرکزی قیادت کا شکریہ ادا کرتے ہوئے ان کے اعتماد پر پورا اترنے کا عزم ظاہر کیا۔ انہوں نے یقین دلایا کہ آزاد کشمیر میں عوامی خدمت، گڈ گورننس اور تعمیر و ترقی کے ایجنڈے کو ترجیحی بنیادوں پر آگے بڑھایا جائے گا۔ ملاقات کے دوران خطے کی سیاسی و حکومتی صورتحال، حکومت سازی کے آئندہ مراحل، کابینہ کی تشکیل اور عوامی فلاح و بہبود کے اقدامات پر تفصیلی تبادلہ خیال کیا گیا۔
یہ بھی پڑھیں: وزیر اعظم سید افتخار گیلانی کی جاتی عمرہ آمد: نواز شریف اور وزیراعظم شہباز شریف سے اعلیٰ سطحی ملاقات
نواز شریف کا 100 روزہ اصلاحاتی منصوبہ اور قائدانہ ہدایات:
مسلم لیگ (ن) کے قائد میاں محمد نواز شریف نے آزاد کشمیر کی نئی حکومت کے پہلے 100 دنوں کے لیے ایک جامع اصلاحاتی منصوبہ وزیراعظم افتخار گیلانی کے ساتھ شیئر کیا۔ انہوں نے ہدایت کی کہ آزاد کشمیر کو پنجاب کی طرز پر جدت اور ترقی کی راہ پر گامزن کیا جائے اور عوام کو فوری ریلیف فراہم کرنے کے لیے اقدامات کیے جائیں۔ قیادت کی جانب سے صحت، تعلیم، صفائی اور بنیادی انفراسٹرکچر کے شعبوں میں واضح بہتری لانے اور عوامی مسائل کو ترجیحی بنیادوں پر حل کرنے پر خاص زور دیا گیا۔
