اسلام آباد: وفاقی دارالحکومت میں پیٹرول پمپس پر مبینہ قلت کی خبروں پر ضلعی انتظامیہ نے شہریوں کے لیے اہم ایڈوائزری جاری کرتے ہوئے صورتحال کو تسلی بخش قرار دیا ہے۔ ضلعی انتظامیہ کے مطابق شہر بھر کے پیٹرول پمپس پر پیٹرول اور ڈیزل کا وافر اسٹاک موجود ہے اور سپلائی چین معمول کے مطابق جاری ہے۔
حکام کا کہنا ہے کہ بعض پیٹرول پمپس پر عارضی نوعیت کی مشکلات کی اطلاعات موصول ہوئیں جن کی بنیادی وجہ ہیوی ٹرانسپورٹ کی عارضی بندش ہے۔ انتظامیہ نے بتایا کہ متاثرہ پمپس کو پیٹرول ٹینکرز کے ذریعے فوری طور پر دوبارہ سپلائی فراہم کی جا رہی ہے تاکہ کسی قسم کی قلت پیدا نہ ہو۔ اسسٹنٹ کمشنرز اپنے اپنے علاقوں میں پیٹرول پمپس کی نگرانی کر رہے ہیں جبکہ ڈپٹی کمشنر اسلام آباد کی ہدایت پر جدید ڈیش بورڈ کے ذریعے شہر بھر میں پیٹرول اور ڈیزل کی دستیابی اور ترسیل کی مسلسل مانیٹرنگ جاری ہے۔
یہ بھی پڑھیں: پی این ایس سی کا جہاز ’’بولان‘‘ 57 ہزار میٹرک ٹن پیٹرول لے کر کراچی پہنچ گیا
وفاقی دارالحکومت میں پیٹرول پمپس پر پیٹرول کی قلت کی خبروں پر ضلعی انتظامیہ کی جانب سے شہریوں کے لیے اہم ایڈوائزری جاری
ضلعی انتظامیہ پیٹرول پمپس پر پیٹرول کی قلت کی رپورٹس کا جائزہ لے رہی ہے، شہر بھر میں پیٹرول پمپس پر پیٹرول اور ڈیزل کا سٹاک وافر مقدار میں موجود ہے۔ ہیوی…
— DC Islamabad (@dcislamabad) April 22, 2026
ضلعی انتظامیہ نے شہریوں سے اپیل کی ہے کہ وہ پیٹرول کی قلت سے متعلق افواہوں پر توجہ نہ دیں اور معمول کے مطابق ایندھن کی خریداری کریں۔ اسلام آباد کی انتظامیہ نے یقین دہانی کرائی ہے کہ شہر میں ایندھن کی سپلائی مستحکم ہے اور صورتحال مکمل طور پر قابو میں ہے۔
