ملک کے مختلف حصوں میں ایک بار پھر موسم نے شدت اختیار کر لی ہے اور اپریل کے آخری ایام میں گرمی کی لہر واضح طور پر بڑھتی جائے گی ۔
محکمہ موسمیات اور مختلف موسمی رپورٹس کے مطابق آج بھی پاکستان کے بیشتر علاقوں میں موسم گرم اور خشک رہنے کا امکان ہے، جبکہ چند شہروں میں حالات نسبتاً مختلف رہ سکتے ہیں ۔
اسلام آباد میں موسم مجموعی طور پر گرم اور خشک رہنے کی پیش گوئی کی گئی ہے۔ دن کے وقت درجہ حرارت 30 سے 32 ڈگری سینٹی گریڈ تک پہنچ سکتا ہے جبکہ رات کے اوقات میں یہ تقریباً 19 ڈگری کے آس پاس رہنے کا امکان ہے۔
مجموعی طور پر وفاقی دارالحکومت میں موسم قدرے خوشگوار ضرور ہے لیکن خشکی برقرار رہے گی ۔
مزید یہ بھی پڑھیں:محکمہ موسمیات کی آزاد کشمیر سمیت پاکستان بھر میں بارشوں کی پیشگوئی
دوسری جانب لاہور میں گرمی کی شدت زیادہ محسوس کی جا رہی ہے۔ شہر میں درجہ حرارت 38 سے 40 ڈگری سینٹی گریڈ تک جانے کا امکان ظاہر کیا گیا ہے۔
دن بھر تیز دھوپ اور خشک موسم غالب رہنے کی وجہ سے شہریوں کو خصوصی احتیاط برتنے کی ہدایت کی جا رہی ہے، خاص طور پر دوپہر کے اوقات میں غیر ضروری باہر نکلنے سے گریز کا مشورہ دیا گیا ہے ۔
کراچی میں موسم نسبتاً گرم اور مرطوب رہے گا۔ یہاں زیادہ سے زیادہ درجہ حرارت تقریباً 33 ڈگری سینٹی گریڈ تک رہنے کی توقع ہے ۔ سمندری ہوائیں چلنے کے باعث رات کے وقت موسم میں معمولی بہتری محسوس کی جا سکتی ہے ۔
ملک کے دیگر علاقوں میں بھی مجموعی طور پر موسم گرم اور خشک رہنے کی پیش گوئی کی گئی ہے، جبکہ شمالی علاقوں میں کہیں کہیں ہلکے بادل یا جزوی تبدیلی کا امکان بھی ظاہر کیا گیا ہے ۔
مزید یہ بھی پڑھیں:محکمہ موسمیات نے کشمیر سمیت ملک بھر میں تیز ہواؤں اور گرج چمک کے ساتھ بارش کی پیشگوئی کر دی
ماہرین موسمیات کے مطابق اپریل کے اختتام تک درجہ حرارت میں مزید اضافہ ہو سکتا ہے، اس لیے شہریوں کو ہدایت کی گئی ہے کہ وہ دھوپ سے بچاؤ، پانی کا زیادہ استعمال اور احتیاطی تدابیر اختیار کریں ۔
