پاکستان سپر لیگ (پی ایس ایل) کے 11ویں ایڈیشن کے چھٹے میچ میں لاہور قلندرز نے کراچی کنگز کے لیے 129 رنز کا ہدف مقرر کیا ہے۔
قذافی اسٹیڈیم لاہور میں کھیلے جا رہے اس میچ میں لاہور قلندرز نے ٹاس جیت کر پہلے بیٹنگ کا فیصلہ کیا۔ پوری ٹیم مقررہ 20 اوورز میں 9 وکٹوں کے نقصان پر صرف 128 رنز ہی بنا سکی ۔
لاہور کی جانب سے سب سے نمایاں بیٹسمین عبداللّٰہ شفیق رہے، جنہوں نے 24 گیندوں پر 33 رنز کی مزاحمتی اننگز کھیل کر ٹیم کو کچھ حد تک سہارا دیا، تاہم باقی بیٹرز وکٹ پر جم کر کھیلنے میں ناکام رہے۔
لاہور کے آخری پانچ اوورز بہت خراب رہے، جس دوران انہوں نے صرف 20 رنز پر 5 وکٹیں گنوا دیں۔ اس دوران کراچی کنگز کی اسپن بولنگ نے مکمل طور پر لاہور کی بیٹنگ پر قابو پایا اور رنز بنانے میں مشکلات پیدا کیں۔
مزید یہ بھی پڑھیں:پی ایس ایل11، پانچویں میچ میں کوئٹہ گلیڈی ایٹرز نے حیدرآباد کنگزمین کو 40 رنز سے ہرا دیا
کراچی کنگز کی بولنگ میں ایڈم زمپا سب سے مؤثر رہے، جنہوں نے 4 اوورز میں صرف 11 رنز دے کر 2 وکٹیں حاصل کیں ۔ معین علی اور میر حمزہ نے بھی 2، 2 وکٹیں حاصل کرتے ہوئے قلندرز کی اننگز کو مزید کمزور بنایا۔
میچ سے قبل لاہور قلندرز کے کپتان شاہین شاہ آفریدی نے کہا تھا کہ ان کی بیٹنگ لائن مضبوط ہے اور وہ اس وکٹ پر 170 سے 180 رنز کا ہدف مناسب سمجھتے ہیں۔
دوسری جانب کراچی کنگز کے کپتان ڈیوڈ وارنر نے اپنی ٹیم کے حوصلے بلند کرتے ہوئے کہا کہ وہ گزشتہ شکست کا بدلہ لینے کے لیے پُرعزم ہیں اور وکٹ پر گیند اچھی لینتھ کے ساتھ تیزی سے آئے گی۔
مزید یہ بھی پڑھیں:پی ایس ایل،اسلام آباد یونائیٹڈ کی بولنگ ناکام، ملتان سلطانز پانچ وکٹوں سے کامیاب
لاہور قلندرز نے کراچی کنگز کے لیے جیت کے لیے 129 رنز کا ہدف مقرر کیا، جبکہ میچ کی صورتحال اور اسپن بولرز کی کامیابی کے باعث قلندرز کی بیٹنگ پر سوالات اٹھتے نظر آ رہے ہیں۔
