نیویارک: اقوام متحدہ کے سیکرٹری جنرل انتونیو گوتیرس نے پاکستان اور افغانستان کی موجودہ کشیدہ صورتحال پر گہری تشویش کا اظہار کیا ہے ۔
ترجمان کے مطابق انتونیو گوتیرس نےکہا ہے کہ وہ اس بحران پر مسلسل نظر رکھے ہوئے ہیں ۔ گوتیرس نے دونوں ممالک سے عالمی قوانین اور اپنے بین الاقوامی ذمہ داریوں کے تحت فوری اقدامات کرنے کا مطالبہ کیا ہے تاکہ انسانی جانوں اور بنیادی حقوق کا تحفظ یقینی بنایا جا سکے ۔
اقوام متحدہ کے ترجمان کے مطابق سیکرٹری جنرل نے خاص طور پر زور دیا کہ فریقین کو شہریوں کی حفاظت کو اولین ترجیح دینی چاہیے ۔ انہوں نے کہا کہ موجودہ کشیدگی کے دوران غیر ضروری تشدد اور پرتشدد کارروائیوں سے گریز کرنا انتہائی ضروری ہے اور بین الاقوامی معیار کے مطابق اقدامات کیے جائیں تاکہ انسانی المیہ سے بچا جا سکے ۔
مزید یہ بھی پڑھیں:پاک افغان سرحد باجوڑسیکٹر کے قریب بڑا ایکشن، سکیورٹی فورسز نے حملہ آور پکڑ لیا
گوتیرس نے کہا کہ اقوام متحدہ تمام ممکنہ ذرائع کے ذریعے پاکستان اور افغانستان کے درمیان امن قائم رکھنے کی کوشش کر رہی ہے اور دونوں ممالک کو پرامن مذاکرات کی طرف راغب کرنے کی کوششیں جاری ہیں ۔ انہوں نے اس بات پر بھی زور دیا کہ خطے میں استحکام اور امن کے لیے بین الاقوامی برادری کی معاونت ضروری ہے تاکہ سرحدی تنازعات اور کشیدگی کا حل نکل سکے ۔
سیکرٹری جنرل کا یہ بیان ایسے وقت میں سامنے آیا ہے جب پاکستان اور افغانستان کے درمیان سرحدی کشیدگی میں اضافہ ہوا ہے، اور علاقے میں سکیورٹی خدشات بڑھتے جا رہے ہیں۔ اقوام متحدہ کی طرف سے یہ انتباہ دونوں ممالک کے لیے ایک واضح پیغام ہے کہ انسانی جانوں کی حفاظت اور ذمہ دار رویہ ضروری ہے ۔
مزید یہ بھی پڑھیں:پاکستان کا جنوبی وزیرستان کے مقابل افغان صوبے پکتیا میں 5 پوسٹوں پر قبضہ ، قومی جھنڈا لہرا دیا
اقوام متحدہ کی طرف سے جاری یہ بیان عالمی برادری کے لیے بھی اہم ہے، جو پاکستان اور افغانستان سے توقع رکھتی ہے کہ وہ تحمل، ذمہ داری، اور عالمی قوانین کے مطابق اقدامات کریں تاکہ خطے میں دیرپا امن اور استحکام قائم رہے ۔
