اسلام آباد (نیوز ڈیسک): ملک بھر میں 16 فروری سے پیٹرولیم مصنوعات کی قیمتوں میں ایک بار پھر اضافے کا امکان ظاہر کیا جا رہا ہے۔ نجی ٹی وی کی رپورٹ کے مطابق، متعلقہ حکام نے نئی قیمتوں کے تعین کے لیے ابتدائی ورکنگ مکمل کر لی ہے اور پیٹرولیم مصنوعات کی قیمتوں میں اضافے کی باقاعدہ تجویز تیار کر لی گئی ہے، جس پر حتمی فیصلہ وزیراعظم کی منظوری کے بعد کیا جائے گا۔
مجوزہ قیمتوں کی تفصیلات کے مطابق پیٹرول کی قیمت میں 4 روپے 39 پیسے فی لیٹر اضافے کی تجویز زیر غور ہے، جبکہ ہائی اسپیڈ ڈیزل کی قیمت میں 5 روپے 40 پیسے فی لیٹر اضافے کا امکان ہے۔ اگر یہ تجویز منظور کر لی جاتی ہے تو ٹرانسپورٹ کے اخراجات میں نمایاں اضافہ متوقع ہے، جس کے براہِ راست اثرات اشیائے ضروریہ کی قیمتوں پر پڑیں گے اور مہنگائی کی لہر میں مزید اضافہ ہو سکتا ہے۔
یہ بھی پڑھیں: صوابی انٹرچینج پر پی ٹی آئی احتجاج کے باعث ٹریفک جام: ایمبولینس میں خاتون جاں بحق
قیمتوں سے متعلق تمام حساب کتاب مکمل ہونے کے بعد آئل اینڈ گیس ریگولیٹری اتھارٹی (اوگرا) یہ سمری پیٹرولیم ڈویژن کو ارسال کرے گی، جہاں سے وزیراعظم کی منظوری کے بعد باضابطہ نوٹیفکیشن جاری ہوگا۔ حتمی منظوری کے بعد نئی قیمتوں کا اطلاق 16 فروری سے ہوگا، تاہم سرکاری اعلان تک ان مجوزہ شرحوں میں معمولی تبدیلی بھی ممکن ہے۔ اس وقت عوام اور کاروباری طبقہ بے چینی سے سرکاری اعلان کا انتظار کر رہا ہے۔
