پاکستان اسٹاک ایکسچینج میں تیزی کا سلسلہ بدستور جاری ہے اور کاروباری ہفتے کے تیسرے روز مارکیٹ نے ایک اور تاریخی سنگِ میل عبور کر لیا۔ آج بدھ کے روز کاروبار کے آغاز کے ساتھ ہی سرمایہ کاروں کے اعتماد میں نمایاں اضافہ دیکھنے میں آیا، جس کے نتیجے میں ہنڈرڈ انڈیکس میں زبردست تیزی ریکارڈ کی گئی۔
کاروبار کے ابتدائی لمحات میں ہی مارکیٹ میں 700 سے زائد پوائنٹس کا اضافہ ہوا، جس کے باعث پاکستان اسٹاک مارکیٹ کا ہنڈرڈ انڈیکس بڑھ کر 1 لاکھ 89 ہزار 427 پوائنٹس کی نئی بلند ترین سطح تک پہنچ گیا۔ اس سطح کو ملکی اسٹاک مارکیٹ کی تاریخ میں ایک اہم پیش رفت کے طور پر دیکھا جا رہا ہے۔
یہ بھی پڑھیں: پاکستان اسٹاک ایکسچینج میں تاریخی تیزی، نیا ریکارڈ قائم
ماہرین کے مطابق مارکیٹ میں اس تیزی کی بڑی وجوہات میں مثبت معاشی اشاریے، شرح سود سے متعلق توقعات، روپے کی قدر میں استحکام، اور بین الاقوامی مالیاتی اداروں کے ساتھ جاری مذاکرات میں پیش رفت شامل ہے۔ اس کے علاوہ مقامی اور غیر ملکی سرمایہ کاروں کی جانب سے بڑے شعبوں میں خریداری کے رجحان نے بھی مارکیٹ کو مضبوط سہارا فراہم کیا ہے۔
واضح رہے کہ گزشتہ کاروباری روز کے اختتام پر ہنڈرڈ انڈیکس 1 لاکھ 88 ہزار 621 پوائنٹس پر بند ہوا تھا، جبکہ آج کے کاروبار کے آغاز میں ہی نمایاں بہتری دیکھنے میں آئی۔ بینکنگ، توانائی، سیمنٹ اور آئل اینڈ گیس کے شعبوں میں خریداری کے باعث مجموعی مارکیٹ پر مثبت اثر مرتب ہوا۔
یہ بھی پڑھیں: پاکستان اسٹاک مارکیٹ میں ہنڈرڈ انڈیکس 1 لاکھ 75 ہزار پوائنٹس عبور کر گیا
سرمایہ کاروں میں بڑھتا ہوا اعتماد اس بات کی عکاسی کرتا ہے کہ پاکستان کی معیشت بتدریج بحالی کی جانب گامزن ہے، اور اس کا مثبت اثر اسٹاک مارکیٹ میں واضح طور پر نظر آ رہا ہے۔ تجزیہ کاروں کے مطابق موجودہ تیزی مارکیٹ کی مضبوط بنیادوں اور سرمایہ کاروں کے اعتماد کی عکاسی ہے، جو مستقبل میں بھی اسٹاک مارکیٹ میں مثبت رجحان برقرار رکھنے میں مددگار ثابت ہو سکتی ہے۔
