2026 کا آغاز عالمی سطح پر شدید کشیدگی اور غیر یقینی صورتحال کے ساتھ ہو چکا ہے۔ دنیا کے مختلف خطوں میں پیش آنے والے حالیہ واقعات نے بین الاقوامی برادری میں گہری تشویش پیدا کر دی ہے، جس کے باعث مشہور بلغارین نجومی بابا وانگا کی پیش گوئیوں پر ایک بار پھر بحث شروع ہو گئی ہے، خصوصاً ان کی 2026 میں تیسری عالمی جنگ سے متعلق پیشین گوئی کے تناظر میں۔
ایران میں اس وقت صورتحال خاصی سنگین ہے جہاں ہزاروں شہری اپنی ہی حکومت کے خلاف سڑکوں پر نکل آئے ہیں۔ بڑے پیمانے پر ہونے والے ان مظاہروں نے خطے میں سیاسی بے چینی کو مزید بڑھا دیا ہے۔ عوامی احتجاج اور ریاستی دباؤ کے اس ماحول کو عالمی میڈیا اور عالمی ادارے گہری نظر سے دیکھ رہے ہیں۔
دوسری جانب لاطینی امریکا میں وینزویلا ایک بڑے سیاسی بحران کی زد میں ہے۔ 3 جنوری 2026 کو امریکی صدر ڈونلڈ ٹرمپ نے اعلان کیا کہ امریکی فوج نے وینزویلا کے اندر ایک فوجی آپریشن کیا، جس کے نتیجے میں صدر نکولس مادورو اور ان کی اہلیہ سیلیا فلورس کو گرفتار کر لیا گیا۔ اس کارروائی کا انداز اور اس کے اثرات دنیا بھر میں زیرِ بحث رہے اور اس واقعے نے عالمی سیاست میں ہلچل مچا دی۔
یہ بھی پڑھیں: تیسری عالمی جنگ:بابا وانگا کی سال 2026 کیلئے حیران کن پیشگوئیاں
اسی دوران امریکی صدر ڈونلڈ ٹرمپ کی جانب سے گرین لینڈ کو خریدنے میں دلچسپی ظاہر کرنے کا بیان بھی سامنے آیا ہے۔ گرین لینڈ، جو ڈنمارک کا ایک خود مختار علاقہ ہے اور جہاں تقریباً 57 ہزار افراد آباد ہیں، اس بیان کے بعد ایک نئے جغرافیائی سیاسی تنازعے کی علامت بن چکا ہے۔ ان تمام واقعات نے عالمی سطح پر بڑھتی ہوئی کشیدگی کو مزید نمایاں کر دیا ہے۔
ان حالات میں بابا وانگا کی پیش گوئیوں کو ایک بار پھر یاد کیا جا رہا ہے۔ بابا وانگا وہی بلغارین نجومی ہیں جن سے منسوب 9/11 اور کووڈ 19 جیسے مہلک وبائی مرض سے متعلق پیش گوئیوں کا حوالہ اکثر دیا جاتا رہا ہے۔ قیاس کیا جاتا ہے کہ انہوں نے 2026 کو “جنگ اور تباہی” کا سال قرار دیا تھا اور اسی برس تیسری عالمی جنگ کے آغاز کی پیشین گوئی کی تھی۔
یہ بھی پڑھیں: بابا وانگا کی 2026 کیلئے اہم اور بڑی پیشگوئیاں سامنے آگئیں
2025 کے دوران اور اب 2026 کی شروعات میں بڑے ممالک کے درمیان بڑھتے ہوئے تناؤ نے عالمی برادری کے خدشات میں اضافہ کر دیا ہے۔ لاطینی امریکا، ایران اور یورپ سمیت مختلف خطوں میں رونما ہونے والے حالیہ واقعات نے ایک بار پھر اس اندیشے کو جنم دیا ہے کہ دنیا کسی بڑے عالمی تصادم کی طرف بڑھ سکتی ہے۔
