(کشمیر ڈیجیٹل) موسمِ سرما اپنے ساتھ تین عام مسائل ضرور لاتا ہے: نزلہ، کھانسی اور خشک جلد۔ اس موسم میں اردگرد موجود اکثر افراد ان بیماریوں میں سے کسی نہ کسی کا شکار دکھائی دیتے ہیں۔ تاہم، ان عام موسمی بیماریوں کا علاج گھر بیٹھے ہی چند قدرتی نسخوں سے ممکن ہے۔
پانی کا زیادہ استعمال نہایت ضروری ہے، کیونکہ زکام یا کھانسی کی صورت میں جسم کا بڑا حصہ پانی خارج کرتا ہے۔ کیفین والے مشروبات سے گریز کریں اور پھلوں کے قدرتی جوس استعمال کریں تاکہ جسم کی پانی کی ضرورت پوری رہے۔
شہد کا استعمال کھانسی کے لیے مؤثر دوا ہے۔ یہ گلے کی خراش میں آرام پہنچاتا ہے اور اگر کھانسی کسی جراثیمی انفیکشن کے باعث ہو تو اس کی شدت اور دورانیہ کم کرتا ہے۔ ایک کھانے کا چمچ شہد روزانہ دو سے تین دن تک کھانے سے واضح فرق محسوس ہوتا ہے۔ شہد نہ صرف جلد کی خشکی دور کرتا ہے بلکہ اسے نرم و ملائم بھی بناتا ہے۔
مزید برآں، ماہرین کے مطابق چند آزمودہ گھریلو نسخے سردی کے عام امراض میں فوری افاقہ دیتے ہیں، جن میں درج ذیل 15 ٹوٹکے خاص طور پر مؤثر مانے جاتے ہیں:
1. شہد، لیموں اور الائچی کا مرکب: ایک چمچ شہد میں لیموں کے چند قطرے اور الائچی پاؤڈر شامل کریں، دن میں دو بار استعمال کریں۔
2. زیادہ گرم پانی پینا: بلغم کے اخراج اور گلے کی صفائی میں مدد دیتا ہے۔
3. ہلدی والا دودھ: رات کو پینے سے گلے کی خراش اور سردی میں فوری آرام ملتا ہے۔
4. گرم پانی اور نمک سے غرارے: گلے کی سوجن کم کرنے میں مؤثر ہیں۔
5. شہد اور برانڈی: جسم کو گرم رکھتی ہے اور کھانسی پر قابو پانے میں مدد دیتی ہے۔
6. ادرک تلسی والی چائے: نزلہ اور کھانسی کے جراثیم کے خلاف مفید ہے۔
7. آملہ: قوتِ مدافعت بڑھاتا ہے اور فلو کے خلاف جسم کو مضبوط کرتا ہے۔
8. ادرک اور نمک: ادرک کے ٹکڑے نمک لگا کر چبانے سے گلا صاف ہوتا ہے۔
9. السِی کے بیج: ابال کر شہد اور لیموں شامل کرنے سے قدرتی شربت تیار ہوتا ہے۔
10. لہسن: گھی میں ہلکا بھون کر کھانے سے سردی اور کھانسی میں افاقہ ہوتا ہے۔
11. گندم کی چوکر کا کاڑھا: نمک اور لونگ کے ساتھ ابال کر پینا مؤثر ثابت ہوتا ہے۔
12. انار کا رس: ادرک اور پیپ پاؤڈر شامل کر کے پینے سے کھانسی میں آرام ملتا ہے۔
13. کالی مرچ: گھی کے ساتھ کھانے سے بلغم صاف ہوتا ہے۔
14. مسالےدار چائے: جسم کو گرم رکھتی ہے اور وائرس کے اثرات کم کرتی ہے۔
15. گرم غذاؤں کا استعمال: سوپ، چائے اور نیم گرم پانی سردی میں بہترین ہیں۔
خشک جلد کے لیے دودھ بھی قدرتی علاج ہے۔ اس میں موجود اجزاء جلد کی کھوئی ہوئی نمی واپس لاتے ہیں۔ چار چمچ دودھ میں عرقِ گلاب کے چند قطرے شامل کر کے دن میں دو بار جسم پر لگائیں اور دس منٹ بعد ٹھنڈے پانی سے دھو لیں۔
ادرک اور پودینے کا شربت بھی کھانسی میں فائدہ مند ہے۔ ادرک پھیپھڑوں سے بلغم خارج کرتا ہے جبکہ پودینہ کھانسی کو روکنے میں مدد دیتا ہے۔ اس کے لیے تین چمچ پسا ہوا ادرک اور ایک چمچ پودینہ چار کپ پانی میں شامل کر کے ابالیں، چھاننے کے بعد اس میں ایک چمچ شہد ملائیں اور بوتل میں محفوظ کر لیں۔ چند گھنٹوں بعد ایک چمچ پینا مفید ہے۔
ناریل کا تیل خشک جلد کے لیے بہترین قدرتی موئسچرائزر ہے۔ اس میں موجود فیٹی ایسڈز جلد کو گہرائی سے نمی فراہم کرتے ہیں۔ نہانے کے بعد یا سونے سے قبل چہرے اور ہاتھوں پر لگائیں، یہ جلد میں فوری جذب ہو کر خشکی سے نجات دیتا ہے۔
طبی ماہرین کے مطابق خشک جلد عام طور پر اس وقت ہوتی ہے جب جسم میں قدرتی تیل یا نمی کم ہو جائے۔ سرد موسم، کم درجہ حرارت، گرم پانی سے نہانا اور سخت صابنوں کا استعمال اس کی اہم وجوہات ہیں۔ اگر جلد میں مسلسل خارش، دراڑ یا درد محسوس ہو تو ماہرِ امراضِ جلد سے مشورہ لینا چاہیے۔
قدرتی نسخوں جیسے شہد، دودھ، ناریل کا تیل اور دلیا کا استعمال جلد کو دوبارہ نرم اور صحت مند بنانے میں مددگار ثابت ہوتا ہے۔ موسمِ سرما میں باقاعدگی سے موئسچرائزر لگانا، خوشبو سے پاک مصنوعات استعمال کرنا اور زیادہ دیر تک گرم پانی سے نہانے سے گریز خشک جلد سے بچاؤ کے بہترین طریقے ہیں۔
