مظفرآباد( کشمیر ڈیجیٹل نیوز) آزاد کشمیر میں مون سون کی قومی شجر کاری مہم کا آغاز کر دیا گیا ہے ۔
وزیراعظم آزادحکومت ریاست جموں وکشمیر چوہدری انوارالحق نے نیو سیکرٹیریٹ چھتر مظفرآباد کے سبزہ زار میں پودا لگا کر قومی شجرکاری مہم کا افتتاح کر دیا ۔ وزیراعظم چوہدری انوارالحق کو سیکرٹری جنگلات انصر یعقوب نے مون سون کی قومی شجرکاری مہم پر تفصیلی بریفنگ دی ۔
اس موقع پر وزیر اعظم انوارالحق نے کہا کہ کلائمیٹ چینج کے منفی اثرات دنیا بھر میں رونما ہو رہے ہیں، آزادکشمیر بھی اس کی لپیٹ میں ہے، موسمیاتی تبدیلیوں کے اثرات کو کم کرنے کے لیے واحد چارہ کار شجرکاری ہے ۔
یہ بھی پڑھیں:کسی کو ایک گلاس پانی نہیں پلایا پھر بھی وزیراعظم بن گیا، یقین نہیں الیکشن لڑوں گا کہ نہیں، چوہدری انوارالحق
وفاقی حکومت کی جانب سے مذکورہ پروگرام کو نظر ثانی کے بعد پبلک سیکٹر ڈویلپمنٹ پروگرام میں شامل کیا جانا انتہائی خوش آئند ہے جس پر میں حکومت پاکستان کو خراج تحسین پیش کرتا ہوں ۔ گرین پاکستان پروگرام کی عوامی پذیرائی کیلئے مؤثر اقدامات اٹھائے جائیں گے ۔
آخر میں شجرکاری مہم کی کامیابی کیلئے دعا کی گئی۔ یاد رہے رواں سال کے دوران شجرکاری مہم کے تحت محکمہ جنگلات نے 12 لاکھ پودہ جات تقسیم کئے ہیں جبکہ اب تک محکمہ جنگلات تجدید ڈویژن کے زیر اہتمام 14 لاکھ پودے لگائے گئے ہیں ۔
