(کشمیر ڈیجیٹل) خیبرپختونخوا میں گزشتہ 24 گھنٹوں کے دوران شدید بارشوں اور فلش فلڈ کے نتیجے میں ہونے والے حادثات میں جاں بحق افراد کی تعداد 189 تک پہنچ گئی ہے۔ پی ڈی ایم اے کی جاری کردہ رپورٹ کے مطابق صوبے کے مختلف اضلاع میں 163 مرد، 14 خواتین اور 12 بچوں کی اموات ہوئی ہیں، جبکہ 21 افراد زخمی ہوئے، جن میں 18 مرد، 2 خواتین اور ایک بچہ شامل ہے۔
رپورٹ کے مطابق بارشوں اور فلش فلڈ سے مجموعی طور پر 45 مکانات کو نقصان پہنچا، جن میں 38 جزوی طور پر متاثر اور 7 مکانات مکمل طور پر منہدم ہوئے۔ سب سے زیادہ متاثرہ علاقے باجوڑ اور بٹگرام ہیں، جبکہ سوات، بونیر، تورغر، مانسہرہ اور شانگلہ میں بھی نقصانات رپورٹ ہوئے ہیں۔ باجوڑ اور بونیر میں ریسکیو آپریشن میں دو ہیلی کاپٹرز حصہ لے رہے ہیں۔
پی ڈی ایم اے کے مطابق شدید بارشوں کا سلسلہ 21 اگست تک وقفے وقفے سے جاری رہنے کا امکان ہے۔ وزیراعلیٰ خیبرپختونخوا کی خصوصی ہدایت پر متاثرہ اضلاع کے لیے مجموعی طور پر 50 کروڑ روپے امدادی فنڈز فراہم کیے گئے ہیں۔ ان میں بونیر کو 15 کروڑ روپے، باجوڑ، بٹگرام اور مانسہرہ کو 10، 10 کروڑ روپے اور سوات کو 5 کروڑ روپے دیے گئے ہیں۔
یہ بھی پڑھیں: وادی نیلم میں کُنڈل شاہی آبشار کا پُل ایک بار پھر سیلابی ریلے میں بہہ گیا
پی ڈی ایم اے نے تمام متاثرہ اضلاع میں امدادی سرگرمیاں تیز کرنے، متاثرین کو فوری ریلیف فراہم کرنے اور متعلقہ اداروں کو سیاحتی مقامات پر بند شاہراؤں اور رابطہ سڑکوں کی بحالی کے لیے تمام وسائل بروئے کار لانے کی ہدایت کی ہے۔ مزید برآں، تمام سیاحوں کو موسمی صورتحال سے باخبر رہنے اور احتیاطی تدابیر اختیار کرنے کی ہدایات جاری کی گئی ہیں۔
