مظفر آباد:حکومت آزادکشمیر نے ایڈہاک،عارضی اور کنٹریکٹ ملازمین کی مدت ملازمت میں30ستمبر 2025 تک توسیع کردی ہےجس کا نوٹیفکیشن جاری کردیا گیا ہے۔
محکمہ سروسز اینڈ جنرل ایڈمنسٹریشن سے جاری نوٹیفکیشن کے مطابق کابینہ کے فیصلہ کے مطابق صدر کی منظوری سے توسیع ایسے ملازمین کی مدت ملازمت میں کی گئی ہے جو بوقت ابتدائی تعیناتی/تقرری مروجہ قواعد کے تحت مطلوبہ تعلیمی قابلیت کے حامل تھے۔
4300 سے زائد کنٹریکٹ ،ایڈہاک اور عارضی ملازمین گزشتہ4سال سے غیر یقینی صورتحال سے دو چار ہیں اور بار بار احتجاج پر مجبور ہیں،حکومت آزادکشمیر ان ملازمین کے مستقبل کا حتمی فیصلہ کرنے کے بجائے ہر تین ماہ بعد 3 ماہ کی توسیع دے کر وقت گزاررہی ہے۔
یاد رہے کہ مسلم لیگ ن کی حکومت نے اپنے دور میں سروسز ایکٹ کے تحت ملازمین کو مستقل کیا تھا مگر تحریک انصاف نے برسر اقتدار آتے ہی یہ ایکٹ منسوخ کردیا تھا جس پر ملازمین نے ریاست گیر احتجاج کیا ۔
حکومت نے ملازمین کے مستقبل کا فیصلہ کرنے کیلئے کمیٹی قائم کی لیکن حکومتی ملازمین کو مستقل کرنے کافارغ کرنے فیصلہ نہیں کر سکی جس پر 4300 ملازمین کا مستقبل ابھی تک سوالیہ نشان ہے۔
ایڈہاک ملازمین مستقلی کیلئے کئی باراحتجاج کر چکے لیکن حکومتی کمیٹی ان کے مستقل کا فیصلہ نہیں کرسکی اور اجلاس اجلاس ہی کھیلا جا رہا ہے۔
