اسلام آباد میں نیشنل ڈیٹا بیس اینڈ رجسٹریشن اتھارٹی (نادرا) نے موبائل رجسٹریشن وین پر درخواست جمع کروانے کے بعد شناختی کارڈ کے حصول کے حوالے سے تمام صورتحال واضح کر دی ہے۔ ترجمان نادرا کی جانب سے اس عمل اور کارڈ کی وصولی کے طریقہ کار سے متعلق تفصیلی معلومات فراہم کی گئی ہیں۔
ترجمان نادرا کے مطابق درخواست جمع کرواتے وقت درخواست دہندہ کو شناختی کارڈ کی ڈیلیوری کے لیے مختلف آپشنز فراہم کیے جاتے ہیں۔ اگر کوئی شہری ہوم ڈیلیوری کا آپشن منتخب کرتا ہے تو اس کے لیے ضروری ہے کہ وہ اپنا درست اور مکمل پتہ درج کروائے تاکہ شناختی کارڈ کامیابی سے دیے گئے پتے پر موصول ہو سکے۔
یہ بھی پڑھیں: نادرا کا رجسٹریشن کے لیے جدید موبائل ڈیوائسز کا استعمال شروع
شناختی کارڈ وصولی کے دیگر طریقے:
ترجمان نادرا نے مزید وضاحت کرتے ہوئے بتایا کہ اگر درخواست دہندہ دفتر کا آپشن منتخب کرتا ہے تو کارڈ اسی دفتر سے وصول کرنا ہوگا۔ اس کے علاوہ اگر کوئی بھی آپشن منتخب نہ کیا جائے تو نادرا کا عملہ درخواست دہندہ کو ڈیلیوری کے لیے متعلقہ قریبی نادرا سینٹر کے بارے میں آگاہ کر دیتا ہے۔
نادرا کی شہریوں سے التماس:
نادرا ترجمان نے تمام درخواست دہندگان سے التماس کی ہے کہ وہ اپنی رسید یا ٹریکنگ آئی ڈی کو مکمل طور پر محفوظ رکھیں۔ مقررہ مدت پوری ہونے پر شہری اس رسید یا ٹریکنگ آئی ڈی کو دکھا کر اپنا تیار شدہ شناختی کارڈ وصول کر سکتے ہیں۔
