مظفر آباد ( کشمیر ڈیجیٹل )وزیر اعظم آزاد کشمیر چوہدری انوار الحق نے یوم پاکستان کے موقع پر اپنے پیغام میں پاکستانی قوم کو یوم پاکستان کی مبارکباد دیتے ہوئے کہا ہے کہ 23مارچ 1940کو ایک الگ کو خود مختارریاست کی تحریک آئینی و قانونی خدوخال کی صورت میں پیش کی گئی۔
اس میں ان علاقوں صوبوں اور خطوں کی نشاندہی کی گئی جو پاکستان میں شامل کئے جانے تھے ، یہ وہ تاریخ ساز دن ہے جس دن مسلمانان برصغیر کی قیادت نے دنیاکی واحد اسلامی نظریاتی مملکت کا تصور واضح کیا۔
یہ خبر بھی پڑھیں ۔کشمیری خواتین بھارتی مظالم کا ڈٹ کر مقابلہ کررہی ہیں، وزیراعظم انوارالحق
قائد اعظم محمد علی جناح کی ولولہ انگیز قیاد ت میں مسلمانان برصغیر نےایمان اتحاد اور تنظیم کے سنہری اصولوں کو اپناتے ہوئے14 اگست 1947 کومملکت خداداد پاکستان کا خواب شرمندہ تعبیر کردیا۔
وزیر اعظم آزاد کشمیر نے کہا کہ پاکستان کے حصول کی جدوجہد میں لاکھوں مسلمانان برصغیر کی قربانیاں اورہجرتیں شامل ہیں،ریاست جموں وکشمیر کے نمائندگان کی اقبال پارک کے اس اجلاس میں شرکت اس بات کی غمازی کرتی ہے کہ یہ خواب کشمیریوں نے بھی پاکستان کی دیگر اکائیوں کے ساتھ مل کر دیکھا یہی وجہ ہے کہ لفظ پاکستان کی تکمیل بھی کشمیر کے بغیر ممکن نہیں ہوتی ۔
یہ بھی پڑھیں ۔وزیر اعظم انوار الحق کی راجہ فاروق حیدر سے ملاقات، غلام اللہ اعوان نے بتا دیا
پاکستان اور جموں کشمیر کے عوام آج بھی اس رشتہ کی اپنے خون سے آبیاری کر رہے ہیں۔مقبوضہ جموں کشمیر میں جاری تحریک آزادی در حقیقت اس تصور پاکستان کے تکمیل کی جدوجہد ہے ،آج پاکستان کو غیر مستحکم کرنے کیلئے دشمن قوتیں فتنہ الخواج اور دیگر دہشتگرد تنظیموں کا سہارا لے رہی ہیں ۔
پاکستان کی افواج اس فتنہ کی سرکوبی اور وطن کی سلامتی کیلئے جانوں کی قربانیاں پیش کررہی ہیں ،پاکستان کی قوم اپنی بہادر افواج کی پشت پر ہے ،ہم وطن کی خاطر جان دینے والوں کو خراج عقیدت پیش کرتے ہیں ۔انہوں نے کہا کہ کشمیریوں کی جدوجہد ایک دن ضرور رنگ لائی گی۔
