آزاد جموں و کشمیر فوڈ اتھارٹی مظفرآباد کے عملے نے علی الصبح زیرو پوائنٹ پر ایک موثر ناکہ بندی کرتے ہوئے موبائل فوڈ ٹیسٹنگ لیبارٹری کے ذریعے دودھ کے معیار کی کڑی جانچ پڑتال کی۔ حکام کے مطابق اس کارروائی کا بنیادی مقصد شہریوں کو خالص اور معیاری خوراک کی فراہمی کو یقینی بنانا تھا۔
فوڈ اتھارٹی کی اس اچانک کارروائی کے دوران مجموعی طور پر دودھ کے 34 مختلف نمونوں کی موقع پر جانچ کی گئی، جن میں سے 10 نمونے ناقص اور غیر معیاری پائے گئے۔ ان ناکام نمونوں میں پانی کی مقدار مقررہ قانونی معیار سے کہیں زیادہ پائی گئی، جو کہ صارفین کی صحت کے ساتھ صریحاً کھلواڑ ہے۔
یہ بھی پڑھیں: مظفرآباد فوڈ اتھارٹی کی ناکہ بندی، غیر رجسٹرڈ اور بغیر لیبارٹری رپورٹ اسنیکس و پاپڑ کی بڑی کھیپ ضبط
قانون شکنوں کے خلاف سخت کارروائی کا عزم:
محکمہ کے مطابق معیار پر پورا نہ اترنے والے اور دودھ میں ملاوٹ کرنے والے تمام متعلقہ افراد کے خلاف قانون کے مطابق فوری اور سخت قانونی کارروائی عمل میں لائی گئی ہے۔ فوڈ اتھارٹی کا کہنا ہے کہ اس قسم کے غیر قانونی اقدامات میں ملوث عناصر کے خلاف اس طرح کی چیکنگ کا سلسلہ مستقبل میں بھی بلا تعطل جاری رکھا جائے گا۔
