رواں برس پرائیویٹ حج پیکج کی قیمتیں 14 لاکھ سے ساڑھے 37 لاکھ روپے تک مقرر کی گئی ہیں، جبکہ عازمین کے لیے بکنگ اور ادائیگی کا عمل ڈیجیٹل طریقے سے مکمل کرنے کی ہدایت کی گئی ہے۔ وزارت مذہبی امور کے مطابق پرائیویٹ حج اسکیم کی بکنگ میں تیزی آ گئی ہے اور مختلف پیکیجز پورٹل پر اپ لوڈ کر دیے گئے ہیں۔
حج منظم کمپنیوں کی جانب سے مختلف حج پیکیجز سرکاری ڈیجیٹل پورٹل پر اپ لوڈ کیے جاچکے ہیں، جنہیں عازمین پاک حج ایپ یا پورٹل کے ذریعے دیکھ کر اپنی ضرورت کے مطابق منتخب کرسکتے ہیں۔ عازمین اپنی مالی استطاعت اور مطلوبہ سہولیات کو مدنظر رکھتے ہوئے دستیاب پیکیجز میں سے انتخاب کرنے کے اہل ہوں گے۔
پرائیویٹ حج اسکیم کے تحت 16 بنیادی پیکیجز:
وزارت کے ترجمان کے مطابق رواں سال پرائیویٹ حج اسکیم کے تحت 16 بنیادی حج پیکیجز کو حتمی شکل دی گئی ہے۔ ان پیکیجز میں مختصر دورانیے کے حج کے ساتھ فائیو اسٹار سہولیات پر مشتمل پیکیج بھی شامل ہیں۔ رواں برس پرائیویٹ حج اسکیم کے لیے مجموعی طور پر 71 ہزار 684 نشستیں مختص کی گئی ہیں۔
یہ بھی پڑھیں: حکومت کی نجی حج آپریٹرز کیلئے ڈیڈ لائن جاری، پیکجز فعال نہ کرنے پر کوٹہ ضبط کرنے کا انتباہ
حج پیکج کی رقم کی ادائیگی کا طریقہ کار:
وزارت مذہبی امور نے عازمین کو واضح ہدایت کی ہے کہ پیکیج کا انتخاب اور رقم کی ادائیگی صرف سرکاری پاک حج ایپ یا متعلقہ پورٹل کے ذریعے کی جائے۔ کسی کمپنی یا فرد کو براہ راست رقم ادا کرنے کی صورت میں ہونے والے نقصان کی ذمہ داری وزارت مذہبی امور پر نہیں ہوگی۔
آخری تاریخ اور کوٹے کی دوبارہ تقسیم کا اختیار:
وزارت کے مطابق پرائیویٹ حج اسکیم کے تحت پیکیج منتخب کرنے اور ادائیگی مکمل کرنے کی آخری تاریخ 20 نومبر 2026 مقرر کی گئی ہے۔ اگر مقررہ تاریخ تک مختص حج کوٹہ مکمل نہ ہوسکا تو وزارت مذہبی امور کو کوٹے کی دوبارہ تقسیم کا اختیار حاصل ہوگا۔
عازمین کو مشورہ دیا گیا ہے کہ بکنگ سے قبل پیکیج کی تفصیلات اور ادائیگی کا طریقہ اچھی طرح جانچ لیں۔ یوں پرائیویٹ حج پیکج کے لیے اس سال عازمین کو قیمت، دورانیے اور رہائش کی سہولیات کے مطابق مختلف آپشنز دستیاب ہوں گے، جبکہ بکنگ کا عمل ڈیجیٹل نظام کے تحت مکمل کیا جائے گا۔
مزید پڑھیں: حج 2027،سرکاری سکیم کا کوٹہ 7دن کی ریکارڈ مدت میں مکمل
