مظفرآباد : وزیر اعظم آزاد کشمیر بیرسٹر افتخار گیلانی کے خصوصی حکم پر آزاد کشمیر کے 4 اضلاع میں مکمل جبکہ 4 اضلاع میں جزوی طور پر انٹرنیٹ سروسز بحال کرنے کا باضابطہ نوٹیفکیشن جاری کر دیا گیا ہے۔
محکمہ داخلہ آزاد کشمیر کی جانب سے جاری کردہ نوٹیفکیشن کی رو سے بعض علاقوں میں تعلیمی سرگرمیوں کو مدنظر رکھتے ہوئے جزوی بحالی عمل میں لائی گئی ہے، جبکہ 2 اضلاع سدھنوتی اور پونچھ (راولاکوٹ) میں انٹرنیٹ سروسز کو مکمل طور پر بند رکھا جائے گا۔
یہ بھی پڑھیں: وزیراعظم آزاد کشمیر کا2 روز میں انٹرنیٹ سروس بحال کرنے کا اعلان
تعلیمی اداروں کے لیے جزوی انٹرنیٹ سروس کی بحالی:
محکمہ داخلہ آزاد کشمیر کے جاری کردہ نوٹیفکیشن کے مطابق مظفرآباد، جہلم ویلی، باغ اور کوٹلی میں براڈ بینڈ اور وائی فائی انٹرنیٹ سروسز کو صرف تعلیمی اداروں جیسے سکولوں، کالجوں اور یونیورسٹیوں کے لیے بحال کیا جائے گا تاکہ وہاں تعلیمی عمل جاری رہ سکے۔
مکمل انٹرنیٹ سروسز کی بحالی والے اضلاع اور وادیاں:
نوٹیفکیشن میں ہدایت کی گئی ہے کہ میرپور، بھمبر، حویلی اور نیلم ویلی میں انٹرنیٹ سروسز کو مکمل طور پر بحال کر دیا جائے۔ اس کے علاوہ لیپا ویلی میں بھی تمام انٹرنیٹ سروسز کو مکمل طور پر فراہم کر دیا گیا ہے جس سے مقامی آبادی کو سہولت ملے گی۔
پونچھ اور سدھنوتی میں سروس کی مکمل معطلی:
دوسری جانب نوٹیفکیشن کے تحت سدھنوتی اور راولاکوٹ (پونچھ) میں انٹرنیٹ سروسز پر عائد پابندی کو برقرار رکھتے ہوئے انہیں مکمل طور پر بند رکھا گیا ہے، اور وہاں کسی قسم کی انٹرنیٹ سہولت فراہم نہیں کی جائے گی۔
