محکمہ موسمیات کے جاری کردہرپورٹ کے مطابق 27 اگست سے مون سون سرگرمیوں میں بالترتیب اضافہ ہو سکتا ہے۔ اس نئی موسمیاتی تبدیلی کے باعث بالائی علاقوں میں بادل بننے اور بعض مقامات پر بارش کا امکان پیدا ہو جائے گا جس سے شہریوں کو گرمی سے راحت ملنے کی توقع ہے۔
ملک کی مجموعی موسمیاتی صورتحال:
محکمہ موسمیات کے مطابق اس وقت ملک کے بیشتر علاقوں میں براعظمی ہوائیں چل رہی ہیں جبکہ جنوبی حصوں میں کمزور مرطوب ہوائیں داخل ہو رہی ہیں۔ اس صورتحال کے باعث ملک کے کئی علاقوں میں گرمی اور حبس برقرار رہنے کا امکان موجود ہے۔
شمالی علاقوں میں مطلع جزوی طور پر ابر آلود رہ سکتا ہے۔ آئندہ دنوں میں مون سون سرگرمیوں میں اضافے کے باعث بالائی علاقوں میں موسم میں کچھ حد تک بہتری آنے کی توقع ظاہر کی گئی ہے۔
اسلام آباد اور لاہور کے موسمی حالات:
اسلام آباد اور اس کے گردونواح میں آج موسم گرم اور مرطوب رہنے کی پیشگوئی کی گئی ہے۔ محکمہ موسمیات کے مطابق دارالحکومت میں کم سے کم درجہ حرارت 26 ڈگری سینٹی گریڈ جبکہ زیادہ سے زیادہ درجہ حرارت 36 ڈگری سینٹی گریڈ تک جانے کا امکان ہے۔ شہریوں کو دن کے گرم اوقات میں غیر ضروری طور پر دھوپ میں نکلنے سے گریز کی ہدایت کی گئی ہے۔
یہ بھی پڑھیں: آزادکشمیر سمیت ملک کے مختلف علاقوں میں بارش کا امکان،الرٹ جاری
دوسری جانب لاہور میں گرمی اور حبس کی شدت نے شہریوں کو پریشان کیے رکھا ہے جہاں موجودہ درجہ حرارت 33 ڈگری سینٹی گریڈ ریکارڈ کیا گیا۔ لاہور میں زیادہ سے زیادہ درجہ حرارت 38 ڈگری اور کم سے کم 29 ڈگری سینٹی گریڈ رہنے کا امکان ہے۔ شہر میں ہوا میں نمی کا تناسب 68 فیصد ہے اور 5 کلومیٹر فی گھنٹہ کی رفتار سے ہوائیں چل رہی ہیں جبکہ لاہور میں آج بارش کا کوئی امکان نہیں ہے۔
کراچی میں موسم کی صورتحال اور فضائی معیار:
کراچی میں موسم جزوی طور پر ابر آلود اور مرطوب رہنے کے ساتھ بوندا باندی کی پیشگوئی کی گئی ہے۔ شہر کا موجودہ درجہ حرارت 29 ڈگری سینٹی گریڈ ریکارڈ ہوا ہے جبکہ زیادہ سے زیادہ 32 سے 34 ڈگری اور کم سے کم 27 ڈگری سینٹی گریڈ رہنے کی توقع ہے۔ کراچی میں جنوب مغربی سمت سے 15 کلومیٹر فی گھنٹہ کی رفتار سے ہوائیں چل رہی ہیں اور ہوا میں نمی کا تناسب 71 فیصد ہے جس کی وجہ سے گرمی کی شدت معمول سے زیادہ محسوس ہو سکتی ہے۔
محکمہ موسمیات کے مطابق کراچی کی فضا میں آلودہ ذرات کی مقدار 100 پارٹیکیولیٹ میٹرز سے کم ریکارڈ کی گئی ہے جس سے فضائی معیار تسلی بخش قرار دیا گیا ہے۔ فی الحال فضائی آلودگی کی صورتحال تشویشناک نہیں ہے، تاہم شہریوں کو زیادہ پانی استعمال کرنے اور شدید گرمی میں احتیاط برتنے کا مشورہ دیا گیا ہے۔
مجموعی طور پر ملک کے زیادہ تر میدانی علاقوں میں شدید گرمی اور حبس کا راج برقرار رہے گا، تاہم 27 اگست سے مون سون سرگرمیوں میں ممکنہ اضافے کے باعث بالائی علاقوں کے موسم میں مثبت تبدیلی اور بارشوں کے بعد درجہ حرارت میں کمی کی امید کی جا رہی ہے۔
