تہران: ایران نے امریکہ اور اسرائیل کے ساتھ حالیہ شدید کشیدگی اور جنگی صورتحال کے پیشِ نظر بند کیے گئے دارالحکومت تہران کے اہم ہوائی اڈے دوبارہ کھولنے کا باقاعدہ اعلان کر دیا ہے۔
ایرانی خبر رساں ادارے کی جانب سے جاری کردہ رپورٹ کے مطابق، حکومت نے تہران کے سب سے اہم خامنہ ای انٹرنیشنل ایئرپورٹ اور مہر آباد ایئرپورٹ کو پروازوں کے لیے مکمل طور پر بحال کر دیا ہے۔ واضح رہے کہ یہ ہوائی اڈے سیکیورٹی خدشات اور خطے کی بدلتی ہوئی صورتحال کے باعث عارضی طور پر بند کر دیے گئے تھے۔ ایران کی سول ایوی ایشن اتھارٹی نے اب ملک کے دیگر ہوائی اڈوں کو بھی مرحلہ وار کھولنے کی منظوری دے دی ہے تاکہ فضائی آپریشنز کو بتدریج معمول پر لایا جا سکے۔
یہ بھی پڑھیں:پی این ایس سی کا جہاز ’’بولان‘‘ 57 ہزار میٹرک ٹن پیٹرول لے کر کراچی پہنچ گیا
حکام کی جانب سے جاری کردہ تفصیلات کے مطابق، جن شہروں کے ایئرپورٹس کو دوبارہ فعال کیا جا رہا ہے ان میں یزد، راشت، شیراز، ابادان، کرمانشاہ، ارمیا اور گورگان شامل ہیں۔ ایئرپورٹس کی اس بحالی کا بنیادی مقصد اندرون و بیرونِ ملک پروازوں کو دوبارہ شروع کرنا اور عوام کو درپیش سفری مشکلات کو ختم کر کے سفری سہولیات فراہم کرنا ہے۔
رپورٹ میں مزید بتایا گیا ہے کہ اگرچہ ایئرپورٹس کھول دیے گئے ہیں، تاہم سیکیورٹی صورتحال کو مسلسل مدنظر رکھا جا رہا ہے۔ حکام کا کہنا ہے کہ تمام آپریشنز کو انتہائی احتیاط کے ساتھ مرحلہ وار مکمل طور پر بحال کیا جائے گا تاکہ مسافروں اور فضائی کمپنیوں کا تحفظ یقینی بنایا جا سکے۔ عالمی برادری اور ایوی ایشن ماہرین ایران کی جانب سے فضائی حدود اور ایئرپورٹس کھولنے کے اس فیصلے کو خطے میں تناؤ کی شدت میں کمی کی علامت کے طور پر دیکھ رہے ہیں۔
