کئی ہفتوں تک عوامی سطح پر نظر نہ آنے کے بعد ایرانی سپریم لیڈر آیت اللہ سید علی خامنہ ای انقلابِ ایران کی 47 ویں سالگرہ کے موقع پر منظرِ عام پر آگئے۔ اس موقع پر ان کی موجودگی نے توجہ حاصل کی، جہاں انہوں نے بانیِ انقلابِ ایران آیت اللہ روح اللہ خمینی کے مزار پر حاضری دی اور دعا کی۔
انقلابِ ایران کی سالگرہ کے موقع پر ہونے والی اس حاضری کے دوران سپریم لیڈر آیت اللہ خامنہ ای نے آیت اللہ خمینی کے مزار پر فاتحہ خوانی کی۔ مزار پر حاضری کے بعد انہوں نے مزار کے احاطے میں نماز بھی ادا کی، جس کے مناظر سامنے آئے۔
یہ بھی پڑھیں: امریکا اپنے سیاسی عزائم مشرق وسطیٰ کے اتحادیوں سے پوشیدہ رکھتا ہے: صدر ٹرمپ
اسی موقع پر سپریم لیڈر آیت اللہ خامنہ ای کی آیت اللہ خمینی کے پوتے حسن خمینی سے ملاقات بھی ہوئی۔ ملاقات مزارِ خمینی کے احاطے میں ہوئی، جہاں دونوں شخصیات کے درمیان مختصر گفتگو دیکھی گئی۔ اس ملاقات کو انقلابِ ایران کی سالگرہ کی تقریبات کے تناظر میں اہم قرار دیا جا رہا ہے۔
آیت اللہ خمینی کے مزار پر اس موقع پر ایران کے صدر مسعود پزشکیان بھی اپنی کابینہ کے ہمراہ پہنچے۔ صدر مسعود پزشکیان اور کابینہ کے ارکان نے بھی مزار پر حاضری دی اور انقلابِ ایران کی سالگرہ کے موقع پر منعقدہ سرگرمیوں میں شرکت کی۔
مزید پڑھیں: خامنہ ای کیخلاف کسی بھی ممکنہ امریکی کارروائی پر علماء جہاد کا فتویٰ دینگے، ایران
انقلابِ ایران کی 47 ویں سالگرہ کے موقع پر آیت اللہ خمینی کے مزار پر اعلیٰ قیادت کی موجودگی نے تقریبات کو نمایاں بنا دیا۔ مزار پر حاضری، دعا، نماز اور ملاقاتیں اسی موقع کی سرگرمیوں کا حصہ رہیں۔
