ہونڈا موٹر کمپنی لمیٹڈ نے اعلان کیا ہے کہ ہونڈا آٹو موبائل بزنس کی نمائندگی کے لیے ایک نیا اور تازہ ڈیزائن پر مشتمل ایچ لوگو اپنایا جائے گا۔
یہ نیا ایچ مارک ہونڈا کی آئندہ حکمت عملی اور آٹو موبائل شعبے میں بڑی تبدیلیوں کی علامت ہوگا۔
یہ بھی پڑھیں: ہونڈا سِوک 2026 کی تعارفی قیمتوں کا اعلان کر دیا گیا
ہونڈا نے پہلی بار 1963 میں ایچ مارک کو اپنی آٹو موبائل مصنوعات کی شناخت کے طور پر متعارف کرایا تھا، جس کے بعد وقتاً فوقتاً اس کے ڈیزائن میں تبدیلیاں کی جاتی رہیں۔
اب اس نشان کو نیکسٹ جنریشن الیکٹرک وہیکلز کی تیاری کے ساتھ ہم آہنگ کرتے ہوئے نیا روپ دیا گیا ہے، جن میں ہونڈا زیرو سیریز بھی شامل ہے۔
کمپنی کے مطابق نئے ایچ مارک کا مقصد ہونڈا کی آٹو موبائل انڈسٹری میں تبدیلی، جدت اور مسلسل ترقی کے عزم کی عکاسی کرنا ہے۔
یہ ڈیزائن پھیلے ہوئے دونوں ہاتھوں کی مانند ہے، جو اس بات کی علامت ہے کہ ہونڈا موبیلیٹی کے امکانات کو وسعت دینا اور صارفین کی ضروریات کو خلوص کے ساتھ پورا کرنا چاہتی ہے۔
ہونڈا کا کہنا ہے کہ نیا ایچ مارک آئندہ نیکسٹ جنریشن ای وی ماڈلز اور ہائبرڈ الیکٹرک وہیکل ماڈلز پر لاگو کیا جائے گا، جن کی مارکیٹ میں آمد 2027 اور اس کے بعد متوقع ہے۔
اس کے علاوہ اس نشان کو صرف گاڑیوں تک محدود نہیں رکھا جائے گا بلکہ ڈیلرشپس، کمیونیکیشن سرگرمیوں اور آٹو موبائل موٹر اسپورٹس میں بھی استعمال کیا جائے گا۔
کمپنی نے بتایا کہ آٹو موبائل مارکیٹ اس وقت الیکٹریفیکیشن اور ذہین ٹیکنالوجیز کے باعث بڑی تبدیلی کے دور سے گزر رہی ہے۔
یہ بھی پڑھیں: آڈی کی لاجواب فیچرز کی حامل الیکٹرک گاڑی نے تہلکہ مچا دیا
نیا ایچ مارک ہونڈا کے دوسرے قیام کی علامت ہوگا، جس کے تحت کمپنی جدید ٹیکنالوجی اور نئے خیالات کے ذریعے صارفین کی توقعات سے بڑھ کر قدر فراہم کرنے اور اس تبدیلی کے دور میں قیادت کا کردار ادا کرنے کا عزم رکھتی ہے۔
