مظفرآباد/لاہور: مسلم لیگ (ن) آزاد کشمیر کے قائدین کا میاں نوازشریف کی زیر صدارت اہم اجلاس ہوا ، اجلاس میں صدر مسلم لیگ (ن) آزاد کشمیر شاہ غلام قادر نے پارٹی قائد میاں نواز شریف کو آئندہ عام انتخابات اور موجودہ سیاسی صورتِ حال پر تفصیلی بریفنگ دی۔
اجلاس میں تنظیمی اُمور، انتخابی تیاریوں اور حکومت آزاد کشمیر کی کارکردگی پر بھی تبادلہ خیال کیا گیا۔
یہ بھی پڑھیں: ن لیگ کاوزیر اعظم کا ووٹ دیکر اپوزیشن میں بیٹھنا حوصلہ افزاروش نہیں،انوارالحق
صدر پاکستان مسلم لیگ ن و اپوزیشن لیڈر آزاد جموں و کشمیر شاہ غلام قادر نے نواز شریف کے سامنے آزاد کشمیر اور گلگت بلتستان کو این ایف سی ایوارڈ میں شامل کرنے کی باضابطہ تجویز پیش کی۔
انہوں نے موقف اختیار کیا کہ گلگت بلتستان اور آزاد کشمیر کے عوام بھی وفاقی وسائل سے حصہ داری کے مستحق ہیں تاکہ ترقیاتی منصوبوں، معاشی استحکام اور بنیادی ڈھانچے کی بہتری کو مزید مضبوط بنایا جاسکے۔
میاں نواز شریف نے این ایف سی ایوارڈ کے حوالے سے وزیراعظم پاکستان سے بات کرنے کی یقین دہانی کروائی اور کہا کہ اس معاملے پر سنجیدگی سے غور کیا جائے گا۔
انہوں نے پارٹی قیادت کو آگاہ کیا کہ وہ آئندہ ماہ 2روزہ دورہ آزاد کشمیر کریں گے، جس میں مختلف ملاقاتیں، جلسوں اور عوامی رابطہ مہم کی سرگرمیاں شامل ہوں گی۔
نواز شریف نے آئندہ آزاد کشمیر انتخابات کو “ریفرنڈم” قرار دیتے ہوئے کہا کہ یہ انتخابات عوام کے اعتماد اور مسلم لیگ (ن) کی پالیسیوں پر عوامی مہر ثبت کرنے کا موقع ہوں گے۔
انہوں نے تنظیمی ڈھانچے کو مزید فعال بنانے، کارکنان سے رابطے بڑھانے اور عوامی مسائل کے حل کو ترجیح دینے کی ہدایت بھی کی۔
اجلاس میں آئندہ انتخابی حکمتِ عملی، ممکنہ اتحاد، امیدواروں کے پینل اور انتخابی مہم کے اہم نکات پر بھی غور کیا گیا۔
مسلم لیگ (ن) آزاد کشمیر کی قیادت نے یقین دہانی کروائی کہ تنظیم مکمل طور پر متحرک ہے اور آئندہ انتخابات میں بھرپور مقابلہ کیا جائے گا۔
اجلاس خوشگوار ماحول میں اختتام پذیر ہوا اور جلد ہی مزید مشاورتی اجلاس منعقد کرنے پر اتفاق کیا گیا۔
یہ بھی پڑھیں: ثاقب مجید کی ن لیگ میں انٹری ، کھاوڑہ کی سیاست دلچسپ مرحلہ میں داخل،سابق امیدواروں کا مستقبل کیا ہوگا؟
ذرائع کے مطابق اجلاس میں مسلم لیگ (ن ) میںنئی شمولیتوں سے متعلق بھی تبادلہ خیال کیا جس پر نوازشریف نے دوٹوک موقف اپنایا کہ پرانے ساتھیوں کو ہی میدان میں اتارا جائیگا۔
یاد رہے کہ کئی حلقوں میں نئے امیدوار ن لیگ میں شمولیت کے خواہشمند ہیں جو ٹکٹ کی یقین دہانی چاہتے ہیں ، نوازشریف کے اعلان کے بعد وہ اس تشویش کا شکار ہوگئے ہیں کہ آیا انہیں ٹکٹ ملے گا بھی یا نہیں۔
حلقہ کھاوڑہ مظفرآبا دسے ثاقب مجید راجا، حلقہ لچھراٹ سے چوہدری شہزاد، ڈڈیال سے اظہر صادق،شرقی باغ سے سردار میر اکبر مسلم لیگ میں شمولیت سمیت ٹکٹ کے خواہشمند ہیں۔
لاہور اجلاس کے بعد نئی شمولیتیں کچھ دن تک موخر ہونے کا امکان ہے اور نوازشریف کے دورہ آزادکشمیر پر ہی فیصلے کئے جائیں گے۔
