مظفرآباد (کشمیر ڈیجیٹل) مظفرآباد کے نوجوان انجینئر خواجہ انیق الرحمٰن نے برطانیہ میں ایک شاندار تعلیمی کامیابی حاصل کی ہے ۔
گرین ہلز سائنس کالج کے سابق طالب علم، خواجہ انیق الرحمٰن نے برطانیہ کی معروف گلاسگو کیلڈونین یونیورسٹی (Glasgow Caledonian University) سے ماسٹر آف سائنس (الیکٹریکل اینڈ الیکٹرانکس انجینئرنگ) کی ڈگری نہایت شاندار انداز میں مکمل کی ہے ۔
خواجہ انیق کی یہ کامیابی ان کے عزم، محنت اور مستقل مزاجی کا نتیجہ ہے۔ انہوں نے اپنی تعلیم کے دوران نہ صرف بہترین تعلیمی کارکردگی کا مظاہرہ کیا بلکہ مختلف پروجیکٹس اور ریسرچ میں بھی نمایاں حصہ لیا ۔
اس کامیابی سے نہ صرف ان کی ذاتی قابلیت میں اضافہ ہوا بلکہ مظفرآباد کے نوجوانوں کے لیے بھی ایک روشن مثال قائم ہوئی ہے ۔
مزید یہ بھی پڑھیں:میرپور یونیورسٹی سائنس اینڈ ٹیکنالوجی میں چوری کا بڑامنصوبہ ناکام : لڑکیوں کا گروہ پکڑا گیا
خواجہ انیق نے کہا کہ یہ کامیابی ان کے والدین کی محبت و رہنمائی، اساتذہ کی محنت اور اپنے اندر مستقل محنت کرنے کی عادت کا نتیجہ ہے ۔
انہوں نے کہا کہ وہ مستقبل میں پاکستان اور کشمیر کے ترقیاتی منصوبوں میں اپنی مہارت اور علم کو بروئے کار لانا چاہتے ہیں تاکہ ٹیکنالوجی کے شعبے میں نمایاں کردار ادا کر سکیں ۔
مظفرآباد کی کمیونٹی نے بھی انجینئر خواجہ انیق کی اس نمایاں کامیابی پر انہیں خراج تحسین پیش کیا اور ان کی حوصلہ افزائی کی ۔
یہ کامیابی اس بات کا ثبوت ہے کہ محنت، لگن اور عزم کے ذریعے دنیا کے بڑے تعلیمی اداروں میں نمایاں مقام حاصل کیا جا سکتا ہے ۔
خواجہ انیق الرحمٰن کی یہ کامیابی نہ صرف ان کے ذاتی کیریئر کیلئے باعث فخر ہے بلکہ نوجوانوں کیلئے بھی ایک مشعل راہ ہے جو تعلیم اور محنت کے ذریعے عالمی سطح پر نمایاں مقام حاصل کرنے کے خواہاں ہیں۔
