اسلام آباد: محکمہ موسمیات نے پیش گوئی کی ہے کہ سال 2026 میں مجموعی طور پر چار فلکیاتی مظاہر رونما ہوں گے جن میں دو سورج گرہن اور دو چاند گرہن شامل ہیں۔ ان میں سے صرف ایک جزوی چاند گرہن پاکستان میں دیکھا جا سکے گا، جبکہ باقی تین فلکیاتی واقعات ملک میں نظر نہیں آئیں گے۔
محکمہ موسمیات کے مطابق پہلا سورج گرہن (Solar Eclipse) 17 فروری 2026 کو ہوگا۔ یہ گرہن پاکستانی وقت کے مطابق سہ پہر 3 بجے شروع ہوگا، 5 بجے اپنے عروج پر پہنچے گا اور 7 بج کر 30 منٹ پر اختتام پذیر ہوگا۔ تاہم، یہ سورج گرہن پاکستان میں دکھائی نہیں دے گا۔
اسی سال کا پہلا چاند گرہن (Lunar Eclipse) 3 مارچ 2026 کو متوقع ہے۔ محکمہ موسمیات کے مطابق یہ چاند گرہن جزوی طور پر ملک کے کچھ شمالی حصوں میں دیکھا جا سکے گا، جس کے دوران چاند کا ایک حصہ زمین کے سایے میں آ جائے گا۔
سال 2026 کا دوسرا سورج گرہن 12 اور 13 اگست کو ہوگا، تاہم محکمہ موسمیات کے مطابق یہ بھی پاکستان میں نظر نہیں آئے گا۔ اس کے بعد دوسرا چاند گرہن 28 اگست کو متوقع ہے جو پاکستان سمیت جنوبی ایشیا کے بیشتر علاقوں میں قابلِ مشاہدہ نہیں ہوگا۔
ماہرینِ فلکیات کے مطابق یہ فلکیاتی مظاہر زمین کے مدار، سورج اور چاند کے زاویوں میں معمولی تبدیلیوں کے باعث رونما ہوتے ہیں۔ ان مظاہر کے ذریعے سائنس دانوں کو خلا کے نظامِ حرکت کو سمجھنے اور اس پر مزید تحقیق کرنے کا موقع ملتا ہے۔ ماہرین کا کہنا ہے کہ اگرچہ ان میں سے زیادہ تر گرہن پاکستان میں نظر نہیں آئیں گے، لیکن عالمی سطح پر فلکیاتی ماہرین کے لیے یہ مواقع تحقیق کے لحاظ سے اہم ثابت ہوں گے۔
یہ بھی پڑھیں: چین کا منصوبہ: پاکستانی خلا باز مختصر دورانیے کے مشنز میں شامل ہوں گے
یہ تمام فلکیاتی واقعات 2026 میں آسمانی حرکات کے تسلسل کا حصہ ہوں گے، جو زمین، سورج اور چاند کے درمیان باہمی تعلق کی سائنسی اہمیت کو اجاگر کرتے ہیں۔
