ملک کے شمالی پہاڑی علاقوں میں موسم سرما کا آغاز ہو گیا ہے ۔ گلگت بلتستان اور خیبرپختونخوا کے بلند علاقوں میں پہلی برف باری نے درجہ حرارت میں نمایاں کمی کر دی ہے اور سردی میں اضافہ ہو گیا ہے ۔
خصوصاً گلگت بلتستان کے پاک چین سرحدی علاقے خنجراب میں شدید برفباری ہوئی، جس کے بعد پورا علاقہ سفید چادر میں لپٹ گیا۔ اسی طرح خیبرپختونخوا کے بلند پہاڑوں پر بھی برفباری ہوئی ہے اور شمالی علاقوں میں سرد موسم کا آغاز ہو چکا ہے ۔
کالام اور ناران کے پہاڑی علاقوں میں بھی برف پڑی، جہاں ہر سال ستمبر کے آخری ہفتے سے موسم سرما کا آغاز ہوتا ہے ۔ دوسری جانب ملک میں بارشوں کا نیا سلسلہ شروع ہونے کو تیار ہے۔
این ڈی ایم اے کے نیشنل ایمر جنسی آپریشن سینٹر نے ملک کے مختلف علاقوں میں ممکنہ بارشوں کے حوالے سے الرٹ جاری کر دیا جس کے مطابق اسلام آباد ، پنجاب ، خیبر پختونخوا اور گلگت بلتستان کے مختلف علاقو ں میں اگلے چوبیس گھنٹوں کے دوران وقفے وقفے سے بارشوں کا امکان ہے ۔
مزید یہ بھی پڑھیں:کشمیر سمیت مختلف علاقوں میں گرج چمک کے ساتھ بارش کی پیشگوئی
بڑے دریاؤں بشمول دریائے جہلم ،راوی ، ستلج کے بالائی علاقوں میں بھی بارشوں کا امکان ہے ، پنجاب میں راولپنڈی، مری ، گلیات ، اٹک ، چکوال ، جہلم، میانوالی ، حافظ آباد، سرگودھا اور خوشاب میں بارشیں متوقع ہیں ۔
خیبر پختونخواہ میں چترال ، دیر، ہری پور، کوہاٹ، کوہستان، خیبر، کرم اور مانسہرہ میں وقفے وقفے بارشیں متوقع ہین ، مہمند، نوشہرہ، مالاکنڈ، چارسدہ ، ابیٹ آباد، بنوں ، بونیر ، ہزارہ ، پشاور صوابی ، وزیرستان اور ملحقہ علاقوں میں گرج چمک کے ساتھ بار شیں ہوں گی ۔
سندھ میں کراچی ، جامشورو ، ٹھٹہ ، بدین ، سجاول ، تھرپارکر اور عمر کوٹ میں بھی بادل برسیں گے ،گلگت بلتستان اور آزاد کشمیرمیں ممکنہ بارشوں کے باعث پہاڑی علاقوں میں لینڈ سلائیڈنگ کے واقعات کا خدشہ ہے ۔
