صدرِ مملکت آصف علی زرداری نے چین کے ایوی ایشن انڈسٹری کارپوریشن (اے وی آئی سی) کے ایئرکرافٹ کمپلیکس کا تاریخی دورہ کیا۔
صدر مملکت جو مسلح افواج کے سپریم کمانڈر بھی ہیں اس موقع پر پورے کمپلیکس میں گئے جہاں جے 10 سی طیاروں کی تیاری کی جاتی ہے۔
جے 10 سی طیارے نے مئی 2025 کے معرکہ حق میں اہم کردار ادا کیا تھا۔ دورے کے دوران صدر زرداری نے انجینئرز اور سائنسدانوں سے ملاقات کی اور انہیں جے 10سی، جے ایف 17 اور جدید ترین جے 20 اسٹیلتھ فائٹرز پر تفصیلی بریفنگ دی گئی۔
صدر کو ڈرون ٹیکنالوجی، خودکار یونٹس اور ملٹی ڈومین آپریشنز کے بارے میں بھی آگاہ کیا گیا۔
یہ بھی پڑھیں: جرات وحکمت بھارت کیخلاف پاکستان کی کامیابی کا باعث بنی، صدر زرداری
صدر مملکت نے کہاکہ جے 10 اور جے ایف 17 طیاروں نے پاک فضائیہ کی صلاحیتوں کو نمایاں طور پر تقویت دی ہے، جبکہ معرکہ حق اور آپریشن ’بنیان مرصوص‘ میں ان طیاروں کی کارکردگی شاندار رہی۔
انہوں نے ’اے وی آئی سی‘ کو چین کی تکنیکی برتری اور پاک چین اسٹریٹجک شراکت داری کی علامت قرار دیا۔
یہ پہلا موقع ہے کہ کسی غیر ملکی سربراہِ مملکت نے اس کمپلیکس کا دورہ کیا۔ صدر کے ہمراہ چیئرمین پیپلز پارٹی بلاول بھٹو زرداری، خاتون اول آصفہ بھٹو اور سینیٹر سلیم مانڈوی والا بھی موجود تھے۔
اس موقع پر پاکستان کے سفیر خلیل ہاشمی اور چین کے سفیر جیانگ زائی ڈونگ بھی صدر مملکت کے ہمراہ تھے۔
صدر آصف علی زرداری نے اس عزم کا اعادہ کیا کہ پاکستان چین کے ساتھ دفاعی پیداوار اور ہوا بازی کے شعبوں میں تعاون کو مزید وسعت دے گا۔
