کشمیر نہ صرف اپنی حسین وادیوں اور دلکش مناظر کے لیے مشہور ہے بلکہ یہاں کے منفرد ہنر، دستکاری اور سوغات بھی دنیا بھر میں شہرت رکھتے ہیں۔
اگر آپ کشمیر جانے کا ارادہ رکھتے ہیں تو یہاں کی مشہور مصنوعات کو اپنی خریداری کا حصہ بنائیں۔ کشمیر کی مارکیٹیں نہ صرف خریداری کا شوق پورا کرتی ہیں بلکہ یہاں کی ثقافت اور تاریخ کا عکس بھی آپ کو یہاں کی ہر چیز میں نظر آئے گا۔
پشمینہ شال اور کمبل:
کشمیر کے دورے کے بغیر پشمینہ شال خریدنا ناممکن ہے۔ یہ شالیں اور کمبل خالص بھیڑ کی اون سے بنائے جاتے ہیں اور اپنی نرمی، گرماہٹ اور خوبصورتی کی وجہ سے دنیا بھر میں مشہور ہیں۔ ایک وقت میں یہ صرف بادشاہوں اور ملکاوں کی پہچان ہوا کرتی تھیں لیکن آج یہ ہر خاص و عام کے لیے دستیاب ہیں۔ مظفرآباد کی مارکیٹوں میں ان کی خوبصورت ورائٹی آپ کو حیران کر دے گی اور آپ خریدے بنا نہیں رہ سکیں گے۔
قالین:
کشمیری قالین اپنے نفیس ڈیزائن اور ہاتھ کی کاریگری کے لیے مشہور ہیں۔ یہ قالین خالص اون اور ریشم سے تیار کیے جاتے ہیں، ان پر بنے پیچیدہ ڈیزائن کشمیری ہنر کے جادو کو ظاہر کرتے ہیں۔ اگر آپ نفاست پسند ہیں تو کشمیری قالین آپ کی خریداری میں شامل ہونا لازمی ہیں۔
روایتی زیورات:
کشمیر کے زیورات اپنے دلکش ڈیزائن اور عمدہ کاریگری کی وجہ سے مشہور ہیں۔ یہاں کے روایتی زیورات جیسے کندلز، چوُنک پھول، ٹیکا اور کڑا خاص طور پر کشمیری ثقافت کی نمائندگی کرتے ہیں۔ ان زیورات میں قیمتی پتھر جڑے ہوتے ہیں جو ان کی خوبصورتی کو چار چاند لگا دیتے ہیں۔ پتھر کے ذیورات خواتین میں کافی مقبول ہیں یہ رنگ برنگے زیورات آپ کی شخصیت میں انفرادیت پیدا کر دیں گے ۔
کشمیری لباس:
کشمیری ملبوسات اپنی خوبصورتی اور نفیس کڑھائی کے لیے مشہور ہیں۔ “پھیرن” کشمیریوں کا روایتی لباس ہے جسے دیکھ کر آپ کشمیر کی ثقافت کو قریب سے محسوس کر سکتے ہیں۔ یہ لباس سرد موسم کے لیے بہترین ہے، خوبصورت رنگوں کے امتزاج کے ساتھ یہ لباس آپ کی شخصیت میں ایک الگ نکھار لے آئیں گے۔
پیپر ماشی:
پیپر ماشی کشمیر کا ایک منفرد ہنر ہے جہاں کاغذ کے گودے کو دلکش اشیاء میں ڈھالا جاتا ہے۔ اس سے تیار شدہ مصنوعات جیسے گلدان، کوسٹر سیٹ اور دیگر سجاوٹی اشیاء آپ کے گھر کی خوبصورتی میں اضافہ کر سکتی ہیں۔
چاندی کے نوادرات:
کشمیر کا چاندی کا کام جسے “نقاش” کہا جاتا ہے دنیا بھر میں مشہور ہے۔ یہاں کے چاندی کے گلدان، چائے کے سیٹ اور فریم نہ صرف کشمیری ہنر کا منہ بولتا ثبوت ہیں بلکہ یورپی ممالک میں بھی ان کی بڑی مانگ ہے ۔
کشمیر کے پھل اور خشک میوے:
کشمیر کو “پھلوں کی سرزمین” کہا جاتا ہے، جہاں سیب، ناشپاتی، انار، آڑو اور چیری جیسے پھل اپنی مثال آپ ہیں۔ یہاں کے خشک میوے جیسے بادام، اخروٹ، اور انجیر دنیا بھر میں مشہور ہیں۔ یہ اشیاء آپ اپنے پیاروں کے لیے تحفے کے طور پر خرید سکتے ہیں۔
کشمیری ولو بلے:
اگر آپ کرکٹ کے شوقین ہیں تو کشمیر کی ولو بلے آپ کو ضرور پسند آئیں گے۔ یہ ہلکے وزن اور مضبوط گرفت والے بلے نہایت مناسب قیمت پر دستیاب ہیں جو کشمیریوں کی محنت اور کاریگری کی عکاسی کرتے ہیں۔
کشمیری مارکیٹوں کا تجربہ:
کشمیر کی ثقافت کو قریب سے دیکھنا ہے تو مظفرآباد، مہاراجہ بازار اور کوکر بازار میں پھریں اور خریداری کریں کیونکہ یہاں کی خریداری نہ صرف آپ کو ترو تازہ کر دے گی بلکہ آپ کو کشمیری تہذیب اور مہمان نوازی سے بھی روشناس کروائے گی۔
