(کشمیر ڈیجیٹل)جنوبی افریقا نے آسٹریلیا کے ہاتھوں سیریز کے تیسرے اور آخری ون ڈے میں بدترین شکست کھا کر اپنی ون ڈے کرکٹ کی تاریخ کا ناپسندیدہ ریکارڈ بنا ڈالا۔
میکے میں کھیلے گئے میچ میں آسٹریلیا نے پہلے بیٹنگ کرتے ہوئے صرف 2 وکٹوں کے نقصان پر 431 رنز بنائے۔ اوپنرز ٹریوس ہیڈ اور مچل مارش نے شاندار آغاز فراہم کیا، دونوں کے درمیان پہلی وکٹ پر 250 رنز کی شراکت ہوئی۔ ہیڈ نے 142 رنز کی جارحانہ اننگز کھیلی جبکہ مارش نے سنچری اسکور کی۔ بعد ازاں کیمرون گرین نے صرف 55 گیندوں پر 118 ناقابلِ شکست رنز جڑ کر اننگز کو نئی بلندیوں تک پہنچایا۔ ان کے ساتھ ایلکس کیری بھی 50 رنز پر ناٹ آؤٹ رہے، دونوں کے درمیان 164 رنز کی شراکت قائم ہوئی۔
432 رنز کے ہدف کے تعاقب میں جنوبی افریقی بیٹرز مکمل طور پر ناکام دکھائی دیے اور پوری ٹیم صرف 155 رنز پر ڈھیر ہوگئی۔ آسٹریلوی بولر کوپر کونولی نے تباہ کن کارکردگی دکھاتے ہوئے صرف 22 رنز کے عوض 5 وکٹیں اپنے نام کیں جبکہ شان ایبٹ اور زیویئر بارٹلیٹ نے 2، 2 وکٹیں حاصل کیں۔
اس طرح جنوبی افریقا کو 276 رنز سے شکست ہوئی جو کہ ان کی ون ڈے تاریخ کی سب سے بڑی ہار ہے۔ اس سے قبل جنوبی افریقا کو 2023 میں بھارت کے ہاتھوں 243 رنز سے شکست کا سامنا کرنا پڑا تھا۔
یہ بھی پڑھیں: یو کے اسلامک مشن آلم راک برمنگھم کی جانب سے صفائی مہم کا آغاز
دلچسپ امر یہ ہے کہ اس بھاری شکست کے باوجود تین میچوں کی سیریز 1-2 سے جنوبی افریقا کے نام رہی، کیونکہ مہمان ٹیم ابتدائی دونوں ون ڈے میچز جیتنے میں کامیاب رہی تھی۔
