بیجنگ: چین نے کہا ہے کہ عالمی منظر نامہ خواہ کچھ بھی ہو پاکستان اور چین کی دوستی لازوال رہے گی۔
چینی وزیر خارجہ کے دورہ پاکستان کے حوالے سے چینی وزارت خارجہ نے بیان جاری کرتے ہوئے کہاکہ وزیر خارجہ وانگ ژی کی اسلام آباد میں وزیراعظم پاکستان شہباز شریف سے ملاقات ہوئی۔
ترجمان نے کہاکہ چین ہمیشہ پاکستان کا قابل بھروسہ اور مضبوط دوست رہا ہے، پاکستان اور چین کی روایتی دوستی ہمیشہ غیرمتزلزل اور ناقابل تسخیر رہے گی۔
واضح رہے کہ چینی وزیر خارجہ نے بھارت اور افغانستان کے بعد پاکستان کا دورہ کیا، جہاں انہوں نے صدر، وزیراعظم، فیلڈ مارشل عاصم منیر اور وزیر خارجہ سے اہم ملاقاتیں کیں۔
یہ بھی پڑھیں: پاکستان کیساتھ تعلقات کو نئی بلندیوں تک لے جا رہے ہیں،چینی وزیرخارجہ
وزیراعظم شہباز شریف سے اسلام آباد میں ہونے والی ملاقات میں چینی وزیر خارجہ نے پاک چین تعلقات کو نئی بلندیوں پر لے جانے کے عزم کا اظہار کیا تھا۔
اس موقع پر چینی وزیرِ خارجہ وانگ ژی کا کہنا تھا کہ پاکستان ہمارا آہنی دوست اور ہر موسم کا اسٹریٹیجک پارٹنر ہے، چین پاکستان کی خودمختاری اور علاقائی سالمیت کے دفاع کے عزم کو سراہتا ہے۔
انہوں نے یہ بھی کہا کہ چین پاکستان سے مل کر علاقائی امن، ترقی اور استحکام کے لیے کام کرتا رہے گا۔
