(کشمیر ڈیجیٹل) پاکستان کرکٹ بورڈ (پی سی بی) نے 2025-26 کے بین الاقوامی سیزن کے لیے قومی کرکٹرز کے نئے سینٹرل کنٹریکٹس کا اعلان کر دیا ہے، جس کے تحت مجموعی طور پر 30 کھلاڑیوں کو کنٹریکٹ دیے گئے ہیں۔
یہ معاہدے یکم جولائی 2025 سے 30 جون 2026 تک مؤثر رہیں گے۔ پی سی بی کے مطابق یہ اقدام قومی کھلاڑیوں کی کارکردگی کو سراہنے اور نئی صلاحیتوں کو ابھارنے کی پالیسی کا حصہ ہے۔
دلچسپ بات یہ ہے کہ اس مرتبہ کسی کھلاڑی کو “کیٹیگری اے” میں شامل نہیں کیا گیا، جبکہ بی، سی اور ڈی کیٹیگریز میں دس، دس کھلاڑیوں کو رکھا گیا ہے۔ گزشتہ برس 27 کھلاڑیوں کو کنٹریکٹ دیا گیا تھا، تاہم اس سال تعداد بڑھا کر 30 کر دی گئی ہے جن میں 12 نئے نام بھی شامل ہیں۔
نئے شامل ہونے والے کھلاڑیوں میں احمد دانیال، فہیم اشرف، حسن علی، حسن نواز، حسین طلعت، خوشدل شاہ، محمد عباس، محمد حارث، محمد نواز، صاحبزادہ فرحان، سلمان مرزا اور سفیان مقیم شامل ہیں۔
گزشتہ سال کی کارکردگی کی بنیاد پر پانچ کھلاڑیوں کو ترقی دی گئی ہے۔ ان میں ابرار احمد، حارث رؤف، صائم ایوب، سلمان علی آغا اور شاداب خان شامل ہیں، جنہیں کیٹیگری سی سے بی میں پروموٹ کیا گیا ہے۔
اسی طرح نو کھلاڑیوں کو ان کی سابقہ کیٹیگری میں برقرار رکھا گیا ہے، جن میں عبداللہ شفیق (سی)، خرم شہزاد، محمد عباس آفریدی، محمد وسیم جونیئر (ڈی)، نعمان علی، ساجد خان، سعود شکیل (سی) اور شاہین شاہ آفریدی (بی) شامل ہیں۔
دوسری جانب آٹھ کھلاڑیوں کو اس مرتبہ کنٹریکٹ کی فہرست سے باہر کر دیا گیا ہے، جن میں عامر جمال، حسیب اللہ، کامران غلام، میر حمزہ، محمد علی، محمد حریرہ، محمد عرفان خان اور عثمان خان شامل ہیں۔
کنٹریکٹ کیٹیگریز اور کھلاڑی
کیٹیگری بی (10 کھلاڑی):
ابرار احمد، بابراعظم، فخر زمان، حارث رؤف، حسن علی، محمد رضوان، صائم ایوب، سلمان علی آغا، شاداب خان، شاہین شاہ آفریدی
کیٹیگری سی (10 کھلاڑی):
عبداللہ شفیق، فہیم اشرف، حسن نواز، محمد حارث، محمد نواز، نسیم شاہ، نعمان علی، صاحبزادہ فرحان، ساجد خان، سعود شکیل
کیٹیگری ڈی (10 کھلاڑی):
احمد دانیال، حسین طلعت، خرم شہزاد، خوشدل شاہ، محمد عباس، محمد عباس آفریدی، محمد وسیم جونیئر، سلمان مرزا، شان مسعود، سفیان مقیم
