اسلام آباد:نیشنل ڈیزاسٹر مینجمنٹ اتھارٹی (این ڈی ایم اے) نے آزادکشمیر اور گلگت بلتستان کے علاقوں میں آج 6 اور 7 اگست شدید بارشوں کے باعث ممکنہ سیلابی صورتحال کا الرٹ جاری کردیا۔
الرٹ کے مطابق ممکنہ بارشوں کے نتیجے میں آزادکشمیر میں وادی نیلم، مظفرآباد، راولاکوٹ، باغ ،ہٹیاں بالا، حویلی، سدھنوتی، کوٹلی، بھمبر اور میرپور کے علاقوں میں بارشوں کے باعث سیلابی صورتحال متوقع ہے۔
گلگت بلتستان کے علاقوں ہنزہ، گھانچے اور شگر میں اچانک سیلابی صورتحال اور ندی نالوں میں طغیانی متوقع ہے۔
یہ بھی پڑھیں: آزاد کشمیر میں بارشوں کا سلسلہ جاری، اسلام آباد میں سڑکیں زیرِ آب
این ڈی ایم اے نے تمام متعلقہ اداروں کو ممکنہ خطرات سے نمٹنے کے لیے پیشگی اقدامات اور تیاری کی ہدایت جاری کردی جبکہ ممکنہ سیلابی صورتحال کے حوالے سے شہریوں کو حساس علاقوں میں غیر ضروری سفر سے گریز کرنے کا کہا گیا ہے۔
ترجمان این ڈی ایم اے کا کہنا ہے کہ تیز بہاؤ کی صورت میں ندی نالوں، پلوں اور پانی میں ڈوبی سڑکوں سے گزرنے سے گریز کریں۔
مقامی انتظامیہ اور متعلقہ ادارے نشیبی علاقوں سے فوری نکاسی آب کے لیے ضروری مشینری اور پمپس تیار رکھیں۔
