اسلام آباد: کشمیر یوتھ الائنس اور مسلم یوتھ لیگ کے رہنماؤں نے کہا ہے کہ پاکستان کے نوجوان کشمیری بھائیوں کی قربانیوں کو کبھی بھولے ہیں نہ بھولنے دیں گے، تحریک آزادی کشمیر کل بھی جاری تھی اور آج بھی جاری ہے۔
نیشنل پریس کلب اسلام آباد میں پریس کانفرنس کرتے ہوئے کشمیر یوتھ الائنس کے صدر ڈاکٹر مجاہد گیلانی، صدر مسلم یوتھ لیگ انجینئر حارث ڈار نے کہا کہ بانی پاکستان نے کشمیر کو پاکستان کی شہ رگ کہا اور شہ رگ ہر صورت چھڑائیں گے، مقبوضہ کشمیر کے بھائیوں کو یہ پیغام دیتے ہیں جدوجہد آزادی میں پاکستان کے نوجوان ہمیشہ کی طرح ان کے شانہ بشانہ ہر قربانی پیش کریں گے۔
یہ بھی پڑھیں:آئی ایس پی آر کا گلوکار احمد جہانزیب کی آوازمیں نیا نغمہ کشمیر ریلیز
حریت رہنما آسیہ انداربی کے بھانجے ڈاکٹر مجاہد گیلانی نے انکشاف کیا کہ 2019 سے قابض بھارتی فورسز نے 25 ہزار سے زائد کشمیریوں کو غیر قانونی طور پر قید کر رکھا ہے،خالو ڈاکٹر قاسم فکتو 31 سال سے قید ہیں اور آسیہ اندرابی بھی 2017 سے جیل میں ہیں۔
مسلم یوتھ لیگ کے صدر حارث ڈار نے بانی پاکستان قائداعظم محمد علی جناح کے اس قول کو دہرایا کہ ’’کشمیر پاکستان کی شہ رگ ہے‘‘ اور اس عزم کا اظہار کیا کہ پاکستان کے نوجوان ہر حال میں اس شہ رگ کو آزاد کروائیں گے
کشمیر یوتھ الائنس نے اعلان کیا کہ پانچ فروری کو پاکستانی نوجوان ہر طرح کی تفریق سے بالاتر ہو کر کشمیری بھائیوں کے ساتھ اظہار یکجہتی کریں گے اور پورے ملک میں تحریک آزادی کشمیر کے حوالے سے بیداری مہم چلائیں گے۔
ضلعی سطح پر یکجہتی کشمیر بائیک ریلیاں نکالی جائیں گی اور چاروں صوبائی دارالحکومتوں میں آل پارٹیز یوتھ کانفرنسز منعقد کر کے نوجوانوں کو متحد کیا جائے گا۔
