اسلام آباد:16 سال سے کم عمر افراد پر سوشل میڈیا اکاؤنٹس بنانے پر پابندی کا بل سینیٹ میں پیش کردیا گیا، خلاف ورزی پر سوشل میڈیا پلیٹ فارم پر 50 لاکھ روپے جرمانہ ہوگا۔
اکاؤنٹ بنانے میں مدد دینے والے کو چھ ماہ قید کی سزا ہوگی، پی ٹی اے پہلے سے بنے ہوئے تمام اکاؤنٹ ڈیلیٹ کردیگا۔
نجی ٹی وی کے مطابق سینیٹ میں سوشل میڈیا (حد عمر برائے صارفین) بل 2025ء پیش کردیا گیا۔
بل سینیٹر سرمد علی اور مسرور احسن نے پیش کیا جس کے مطابق 16 سال سے کم عمر افراد پر سوشل میڈیا اکاؤنٹس بنانے پر پابندی ہوگی، سوشل میڈیا کمپنیوں پر نابالغ صارفین کے اکاؤنٹس روکنے کی قانونی ذمہ داری عائد ہوگی۔
یہ بھی پڑھیں: پولیس افسران واہلکاروں پر تنخواہ سے متعلق سوشل میڈیا کے استعمال پرپابندی عائد
نابالغ صارف کو سوشل میڈیا تک رسائی دینے پر سوشل میڈیا پلیٹ فارم پر 50ہزار سے 50 لاکھ روپے تک جرمانہ ہوگا جبکہ نابالغ کو اکاؤنٹ بنانے میں سہولت دینے والے کو 6 ماہ قید اور جرمانے کی سزا دی جاسکے گی۔
بل میں کہا گیا ہے کہ پی ٹی اے نابالغوں کے موجودہ سوشل میڈیا اکاؤنٹس بند کرے گی، پی ٹی اے کو قواعد و ضوابط بنانے اور وضاحتوں کا اختیار حاصل ہوگا۔
بل کا مقصد بچوں کو آن لائن استحصال، سائبر بلیئنگ اور نقصان دہ مواد سے بچانا ہے، حکومت نے والدین اور بچوں میں ڈیجیٹل شعور بیدار کرنے کا فیصلہ کیا ہے۔
یہ بل آسٹریلیا اور نیوزی لینڈ کی پالیسیوں سے ہم آہنگ قدم قرار دیا گیا ہے۔
