اسلام آباد: وزیراعظم آزاد کشمیر چوہدری انوارالحق نے کہا ہے کہ بلوچستان میں خون خرابے کے پیچھے بھارت ہے، بھارت اپنی حرکتوں سے بازنہ آیا تو اسے مزید ہزیمت کا سامنا کرنا پڑیگا۔
نجی ٹی وی سے گفتگو میں وزیراعظم چوہدری انوار الحق نے کہا کہ بھارت اپنی حرکتوں سے باز نہیں آ رہا، بلوچستان میں خون خرابے کے پیچھے بھارت ہے، حالیہ جنگ میں بھارت کو ہر محاذ پر رسوائی کا سامنا کرنا پڑا۔
پاکستان ائیر فورس کی برتری کا مشاہدہ پوری دنیا نے دیکھا، فیلڈ مارشل کی قیادت میں پاکستان نے تاریخی کامیابی حاصل کی، بھارت اپنی حرکتوں سے بازنہ آیا تو اسے مزید ہزیمت کا سامنا کرنا پڑے گا۔
میرے خلاف27ارکان سامنے آئیں، عدم اعتماد سے قبل اقتدار چھوڑ دونگا
وزیراعظم انوارالحق کاکہنا تھا کہ آزاد کشمیر اسمبلی میں کسی جماعت کے پاس نمبر پورے نہیں ہیں،میرے خلاف 27 ارکان سامنے آجائیں تو عدم اعتماد تحریک آنے سے پہلے اقتدار چھوڑ دوں گا۔
انہوں نے کہا کہ آزاد کشمیر کی سیاست میں ہلچل جمہوری عمل کا حصہ ہے، حکومت کی تبدیلی نمبرز کے ذریعے آتی ہے، آزاد کشمیر اسمبلی میں کسی جماعت کے پاس نمبر پورے نہیں۔
کوئی بھی جماعت نمبرز پورے کرکے عدم اعتماد لاتی ہے تو اقتدار سے الگ ہو جاؤں گا۔
یہ بھی پڑھیں: آزاد کشمیر کے وزیراعظم کا گڈ گورننس پر زور، پسماندہ علاقوں کی ترقی اولین ترجیح قرار
انہوں نے کہا کہ کشمیریوں کی اخلاقی، سفارتی اور سیاسی حمایت پاکستان کا کام ہے، بھارت کے ناجائز قبضے کے خلاف مسلح جدوجہد کشمیریوں کا حق ہے۔
وزیر اعظم کا کہنا تھا 13 جولائی یوم شہدائے کشمیر تحریک آزادی کشمیر کی بنیاد ہے، 22 لوگ اذان دیتے دیتے سری نگر میں جام شہادت نوش کر گئے، کشمیریوں کے جذبہ آزادی کو بھارت نہیں دبا سکتا۔
انوارالحق کا کہنا تھا انتخابات سے قبل چیف الیکشن کمشنر کی تعیناتی پر مشاورت جاری ہے، حکومت شفاف انتخابات کو یقینی بنانے کیلئے ہر اقدام کریگی۔
آزاد کشمیر میں احتساب بیورو مکمل طور پر فعال نہیں ہو سکا، ہم نے آزادکشمیر میں مالی ضابطگی کی مثال قائم کی، آڈٹ رپورٹ سامنے آنے کا مطلب خرد برد نہیں ہے۔
