گروک‘ پاکستانیوں کے نشانے پر: سیاست، طنز و مزاح اور سوالوں کی بوچھاڑ

ٹیکنالوجی / / By

مظفرآباد : ایلون مسک کا بنایا گیا مصنوعی ذہانت پر مبنی چیٹ بوٹ ’گروک‘ اس وقت پاکستان میں سوشل میڈیا پلیٹ فارم ایکس (سابقہ ٹوئٹر) پر چھایا ہوا ہے۔ ایک جانب اسے عالمی سطح پر دلچسپی کا مرکز قرار دیا جا رہا ہے تو دوسری طرف پاکستانی صارفین نے اسے اپنی سیاست، طنز، مزاح اور جذباتی تجزیوں کا مرکز بنا دیا ہے۔

دنیا کے جدید ترین چیٹ بوٹس میں شمار ہونے والا ’گروک‘ پاکستان میں تیزی سے مقبول ہو رہا ہے اور روزانہ درجنوں صارفین سیاسی، سماجی، اور مزاحیہ نوعیت کے سوالات اس سے کرتے دکھائی دیتے ہیں۔ یوں محسوس ہوتا ہے کہ پاکستانی صارفین نے گروک کو صرف ایک چیٹ بوٹ نہیں بلکہ قومی مشیر، تجزیہ کار اور تنقید نگار سمجھ لیا ہے۔

صحافی عمر چیمہ نے ایک دلچسپ سوال کیا: “ایسا کون سا پاکستانی سیاستدان ہے جو خبطِ عظمت اور نرگسیت کا شکار ہو؟” گروک کا دوٹوک جواب آیا: “عمران خان”۔ اس نے اپنے جواب کی بنیاد متعدد ذرائع پر رکھی جن کے مطابق عمران خان میں تنقید برداشت نہ کرنے، بحث پر حاوی ہونے اور خود کو نجات دہندہ سمجھنے جیسے رویے پائے جاتے ہیں۔

اسی طرح ایک صارف نے گروک سے پوچھا کہ پاکستان کا سب سے کامیاب وزیراعظم کون ہے؟ عمران خان، نواز شریف، شہباز شریف یا بے نظیر بھٹو؟ گروک نے نواز شریف کو ترجیح دی تو ن لیگ کے حامیوں نے اس پر چٹکلے چھوڑے اور کہا کہ پی ٹی آئی کو تو گروک بھی قابلِ قبول نہیں رہا۔

سیاسی فضا میں گرمجوشی اس وقت مزید بڑھی جب کچھ صارفین نے گروک کے جوابات کو اپنی وابستگیوں کے آئینے میں دیکھنا شروع کر دیا۔ صحافی اسد اللہ خان نے طنزیہ تبصرہ کیا: “گروک پر یوتھیا ہونے کا الزام لگنے والا ہے۔”

ایک اور صارف نے لکھا: “گروک سوچ رہا ہو گا کہ یہ کیسی قوم ہے جس سے واسطہ پڑا ہے!” جبکہ صنم جاوید خان نے ہنستے ہوئے کہا کہ “گروک میرے ٹوئٹس کی ایسی تشریح کر رہا ہے لگتا ہے اس بار میں گروک کی وجہ سے جیل جاؤں گی۔”

صحافی صابر شاکر نے گروک پر طنز کرتے ہوئے کہا: “بے بسی کا یہ عالم ہے کہ گروک کے خلاف پیکا ایکٹ بھی نہیں لگایا جا سکتا۔”

احتشام الحق نے گروک کو نہایت شاطر قرار دیتے ہوئے دعویٰ کیا کہ وہ سوال کرنے والے کی پروفائل دیکھ کر اس کے مطابق جواب دیتا ہے تاکہ سب کو خوش رکھ سکے۔

ایکس پر سیاسی لڑائیوں میں گروک کی بے بسی پر ایک صارف نے لکھا: “گروک ن لیگ اور پی ٹی آئی کی لڑائی میں بری طرح پھنس گیا ہے۔”


ایلون مسک نے گروک کو دنیا کا سب سے ذہین چیٹ بوٹ قرار دیا تھا جو نہ صرف سوالات کے جوابات دیتا ہے بلکہ مزاحیہ اور غیر روایتی انداز میں اپنی بات کہنے کی صلاحیت بھی رکھتا ہے۔ پاکستان میں گروک کے ساتھ ہونے والی یہ سوشل میڈیا انٹرایکشن ظاہر کرتی ہے کہ مصنوعی ذہانت اب صرف تکنیکی دنیا تک محدود نہیں رہی بلکہ یہ سیاست، مزاح، اور معاشرتی رویوں کا حصہ بھی بن چکی ہے۔

یہ بھی پڑھیں: ملک بھر میں شدید بارشوں اور سیلاب کا خطرہ، این ڈی ایم اے کا الرٹ جاری

Must Read

Scroll to Top