اسلام آباد: ترجمان متروکہ وقف املاک بورڈ کے مطابق بھارت نے سکھ یاتریوں کو گرو ارجن دیو جی کے شہیدی دن کی رسومات کیلئے پاکستان آنے سے روک دیا ہے۔
ترجمان کا کہنا ہے کہ سکھ یاتریوں نے 9 جون کو رسومات میں شرکت کے لیے پاکستان آنا تھا، یاتریوں کی عدم آمد کے باوجود واہگہ بارڈر پر ان کے علامتی استقبال کے لیے اسٹیج تیار کیا گیا ہے۔
اس موقع پر پاکستان سکھ گوردوارہ پربندھک کمیٹی یاتریوں کے استقبال کیلئے موجود ہوگی۔
متروکہ وقف املاک بورڈ اور پاکستان سکھ گوردوارہ پربندھک کمیٹی کے ارکان علامتی طور پر یاتریوں کا استقبال کریں گے اور ریڈ کارپٹ بھی بچھایا جائے گا۔
یہ بھی پڑھیں:کینیڈا میں سکھ تنظیموں کا مطالبہ: مودی کو جی 7 اجلاس میں مدعو نہ کیا جائے
ایڈیشنل سیکریٹری شرائنز سیف اللہ کھوکھر نے کہا کہ یاتریوں کی غیر موجودگی کے باوجود استقبال علامتی طور پر کیا جائے گا تاکہ دنیا کو پاکستان کا اقلیت نواز، دوستانہ اور بین المذاہب ہم آہنگی پر مبنی چہرہ دکھایا جا سکے۔
انہوں نے کہا کہ گرو ارجن دیو جی کی قربانی امن، برداشت اور مذہبی آزادی کی علامت ہے اور ان کی تعلیمات آج بھی رواداری کا پیغام دیتی ہیں۔
پاکستان سکھ گوردوارہ پربندھک کمیٹی کے مطابق ہر سال طے شدہ معاہدے کے تحت بھارتی یاتری 9 جون کو گرو ارجن دیو جی کے شہیدی دن کی رسومات میں شرکت کے لیے آتے ہیں، مگر اس بار بھارتی حکومت نے یاتریوں کو پاکستان آنے کی اجازت نہیں دی۔
اس کے باوجود پاکستان میں تمام انتظامات مکمل ہیں۔ متروکہ وقف املاک بورڈ نے فول پروف سکیورٹی کا بندوبست کر رکھا ہے اور واہگہ بارڈر پر استقبال کی تیاریاں مکمل کر لی گئی ہیں۔
چیئرمین بورڈ ڈاکٹر ساجد محمود کی ہدایت پر تمام متعلقہ شعبے الرٹ کر دئیے گئے ہیں۔ سیف اللہ کھوکھر کے مطابق اگر یاتری آتے تو انہیں حسب روایت بین الاقوامی معیار کی سہولیات فراہم کی جاتیں۔
