فیلڈ مارشل سید عاصم منیرنے مختلف جامعات کے وائس چانسلرز، پر نسپلز اور سینئر اساتذہ کرام سے بات چیت کرتے ہوئے کہا ہے کہ اساتذہ کرام پاکستان کا سب سے بڑا سرمایہ ہیں، میں آج جو کچھ بھی ہوں ، اپنے والدین اور اساتذہ کرام کی وجہ سے ہوں۔
انہوں نے کہا کہ بلوچستان میں دہشت گرد فتنہ الہندوستان ہیں، ان کا بلوچوں سے کوئی تعلق نہیں ، پاکستان کو ایسی مضبوط ریاست بنانا ہے جس میں تمام ادارے قانون کے مطابق ، آئین کے تحت، بغیر کسی سیاسی دباؤ، مالی اور ذاتی فائدے کے عوام کی فلاح و بہبود کے لئے کام کریں۔
یہ خبر بھی پڑھیں :بھارت جان لے پاکستان کشمیر کو کبھی نہیں چھوڑے گا،فیلڈ مارشل عاصم منیر
فیلڈ مارشل کا کہنا تھا کہ پانی پاکستان کی ریڈ لائن ہے اور24 کروڑ پاکستانیوں کے اس بنیادی حق پر آنچ نہیں آنے دیں گے۔پاکستان، ہندوستان کی اجارہ داری کبھی قبول نہیں کرے گا ، ہندوستان نے کئی دہائیوں سے کشمیر کے مسئلے کو دبانے کی کوشش کی مگر وہ ناکام ہو چکا ہے، اب یہ ممکن نہیں رہا ۔
فیلڈ مارشل عاصم منیر کا کہنا تھا کہ پاکستان کی اگلی نسلوں کی کردار سازی اساتذہ کرام کی ذمہ داری ہے ،اسا تذہ نے پاکستان کی کہانی اپنی اگلی نسلوں کو بتانی ہے۔
انہوں نے کہا کہ بھارت جان لے پاکستان کشمیر کو کبھی نہیں چھوڑے گا،پاکستان ہندوستان کی اجارہ داری قبول نہیں کرے گا ۔
معرکہ حق میں اللہ تعالیٰ نے ہر طرح سے پاکستان کی مدد کیجو اس بات کا ثبوت ہے کہ جب پوری قوم ایک آہنی دیوار بن جائے تو دنیا کی کوئی طاقت اُسے گرا نہیں سکتی۔
دہشت گردی ہندوستان کا اندرونی مسئلہ ہے جس کی بنیادی وجہ اقلیتوں بالخصوص مسلمانوں پر بڑھتا ہوا ظلم اور تعصب پسندی ہے، جبکہ کشمیر ایک عالمی سطح کا مسئلہ ہے ۔
فیلڈ مارشل سید عاصم منیر نے کہا کہ جو کوئی بھی ریاست کو کمزور بنانے کا بیانیہ بنانے کی کوشش کرے اُس کی نفی کریں یہ جو محفوظ دھرتی ہے ، اس کے پیچھے وردی ہے ،شرکاء کا سوال جواب سیشن میں تاثر،شرکاء کا کہنا تھا کہ ہمیں پاکستان اور اپنی مسلح افواج پر فخر ہے اور ہم ان کے شانہ بشانہ کھڑے رہیں گے ۔
