یورپی ملک مالٹا نے اعلان کیا ہے کہ وہ اگلے ماہ 20 جون کوفلسطینی ریاست کو باضابطہ طور پر تسلیم کرے گا۔
غیر ملکی میڈیا رپورٹس کے مطابق وزیر اعظم رابرٹ ابیلا نے یہ اعلان اتوار کو ایک سیاسی تقریب کے دوران کیا، جس میں انہوں نے عالمی اور مقامی مسائل بالخصوص غزہ میں جاری انسانی بحران پر روشنی ڈالی۔
وزیر اعظم رابرٹ ابیلا نے اپنے خطاب میں کہا تھا کہ ہم غزہ میں جاری انسانی المیے پر خاموش تماشائی نہیں بن سکتے۔
فلسطین کو بطور ریاست تسلیم کرنا نہ صرف ہماری اخلاقی ذمہ داری ہے بلکہ انصاف اور انسانی وقار کے تقاضوں کے مطابق بھی ہے۔
انہوں نے اعلان کیا کہ مالٹا 20 جون کو اقوام متحدہ کی کانفرنس کے بعد فلسطینی ریاست کو باضابطہ طور پر تسلیم کرے گا۔
واضح رہے کہ مالٹا نے اپریل 2023 میں فلسطین کو اقوام متحدہ کی سلامتی کونسل میں مکمل رکنیت دینے کے حق میں ووٹ دیا تھا لیکن اس کے باوجود ملک نے ابھی تک فلسطینی ریاست کو سرکاری طور پر تسلیم نہیں کیا ہے۔
اقوام متحدہ کے 193 میں سے 147 رکن ممالک اب تک فلسطین کو ایک خودمختار ریاست کے طور پر تسلیم کر چکے ہیں۔
حالیہ برسوں میں آرمینیا، سلووینیا، آئرلینڈ، ناروے، اسپین، بہاماس، ٹرینیڈاڈ اور ٹوباگو، جمیکا اور بارباڈوس جیسے ممالک بھی اس فہرست میں شامل ہوئے ہیں۔
