جموں و کشمیر سالویشن موومنٹ (جے کے ایس ایم) کے چیئرمین الطاف احمد بھٹ نے کشمیری عوام کی سیاسی جدوجہد کے ساتھ ساتھ ان کی سماجی و معاشی ترقی پر بھی زور دیا ہے۔
اسلام آباد میں گفتگو کرتے ہوئے چیئرمین الطاف احمد بھٹ نے وزیرِاعظم شہباز شریف کی مسئلہ کشمیر پر کشمیری عوام کے حقِ خودارادیت کی حمایت کو سراہا۔ انہوں نے ڈینش اسکول جیسے اقدامات کی تعریف کرتے ہوئے اسے تعلیم اور صحت کے شعبے میں اصلاحات کے ذریعے ترقی کا ایک وسیع وژن قرار دیا۔
چیئرمین بھٹ نے اس بات پر زور دیا کہ ایسے اقدامات کو کشمیر اور گلگت بلتستان جیسے پسماندہ علاقوں تک بڑھانے کی ضرورت ہے۔ ان کے مطابق معیاری تعلیم اور صحت کی سہولیات سماجی و معاشی ترقی کے اہم ستون ہیں اور ان پر کام کرکے خطے میں بنیادی تبدیلیاں لائی جاسکتی ہیں۔
