اسلام آباد(کشمیر ڈیجیٹل)وزیراعظم شہبازشریف نے معرکۂ حق کے شہداء کے ورثاء اور زخمیوں کیلئے پیکیج کا اعلان کردیا۔میڈیارپورٹس کے مطابق وزیراعظم کے اعلان کے تحت معرکہ حق میں شہید ہونے والے پاکستانی شہریوں کے ورثا کو 1 کروڑ جبکہ زخمی ہونے والوں کو 10 سے 20 لاکھ روپے دیے جائیں گے۔
پاک افواج کے شہداء کے ورثاء کو رینک کے حساب 1 کروڑ سے 1 کروڑ 80 لاکھ روپے کی رقم شہدا پیکیج کے تحت دی جائے گی۔پاک افواج کے شہداء کے ورثاء کو گھر کی سہولت کے لئے رینک کے حساب سے 1 کروڑ 90 لاکھ سے 4 کروڑ 20 لاکھ روپے تک دیئے جائیں گے
پاک افواج کے شہداء کی ریٹائرمنٹ کی تاریخ تک ان کی مکمل تنخواہ بمعہ الاونسز جاری رہیں گی۔اعلامیے کے مطابق پاک افواج کے شہداء کے بچوں کو گریجویشن تک مفت تعلیم دی جائے گی جبکہ ہر شہید کی ایک بیٹی کی شادی کیلئے 10 لاکھ روپے کی میرج گرانٹ دی جائے گی۔
پاک افواج کے زخمی ہونے والوں کو 20 لاکھ روپے سے 50 لاکھ روپے فی کس دیئے جائیں گے۔وزیراعظم شہبازشریف نے بھارتی حملے میں متاثر ہونے والے گھروں، شہید مساجد کی تعمیر ، شہدا کے بچوں کی کفالت کا اعلان بھی کیا۔
وزیراعظم کا کہنا تھا کہ زخمیوں کے علاج کا تمام خرچ وفاقی حکومت اٹھائے گی، پاکستان کی عزت وعظمت کے تحفظ اور دفاع میں جس نے جس محاذ پر جو خدمات سر انجام دی ہیں، ان کا اعتراف قومی سطح پر کیاجائے گا اور انہیں اعزازات سے نوازا جائے گا۔
وزیراعظم شہبازشریف کا ہر سال 10 مئی کو یوم معرکہ حق منانے کا اعلان
