اسلام آباد ( مانیٹرنگ ڈیسک )امریکہ میں پاکستانی سفیر رضوان سعید شیخ نے کہا ہے کہ کوئی یہ سوچے بھی نہ کہ پاکستان پر حملہ کیا جائے گا اور پاکستان کی طرف سے کوئی جواب نہیں دیا جائے گا۔ اب تک پاکستان نے صرف اپنے دفاع کا حق استعمال کیا ہے ،جوابی کارروائی بھی کرے گا۔
تفصیلات کے مطابق ایک امریکی چینل کو انٹرویو دیتے ہوئے رضوان سعید شیخ نے کہا کہ پہلگام واقعے کے بعد بغیر کسی ثبوت کے جارحیت کا مظاہرہ قابل مذمت ہے۔
عالمی برادری کے لیے سوال یہ ہے کہ کیا دنیا بغیر کسی ثبوت کے کسی خودمختار ملک کے خلاف کھلی جارحیت کی مثال قائم کرنا چاہتی ہے۔
امریکہ میں سفیر نے کہا کہ گزشتہ تین راتوں سے بھارت اشتعال انگیزی اور جارحیت کا مظاہرہ کر رہا ہے۔ پاکستان نے صبر اور تحمل کا مظاہرہ کرتے ہوئے اپنے دفاع کا حق استعمال کیا۔
یہ خبر بھی پڑھیں ۔بھارت کوہزیمت پرہزیمت، ایسا جواب دینگے کہ دنیا یاد رکھے گی ، عطاء اللہ تارڑ
بغیر ثبوت کے الزامات لگانا انتہائی مضحکہ خیز ہے،رضوان سعید شیخ نے مزیدکہا کہ پاکستان نے پہلگام واقعے کی غیر جانبدارانہ اور شفاف تحقیقات کی پیشکش کی ہے۔
پاکستان تناؤ نہیں چاہتا لیکن اشتعال انگیزی اور جارحیت کا سخت ردعمل سامنے آئے گا، پاکستان کو جوابی کارروائی کا حق حاصل ہے۔
انہوں نے کہا کہ بھارتی حملے میں پاکستان کے معصوم شہریوں، خواتین اور بچوں کو نشانہ بنایا گیا کرکٹ اسٹیڈیم میں کون سا دہشت گرد مرکز کام کر رہا تھا؟ ہندوتوا فلسفہ کے پیروکاروں اور اس کی پیروی کرنے والی حکومت کے لیکچرز مضحکہ خیز اور ناقابل قبول ہیں۔
