مظفرآباد(کشمیر ڈیجیٹل) 21 اپریل تا 25 اپریل 2025 آزاد کشمیرکے تمام اضلاع مظفر آباد، نیلم،جہلم ویلی (ہٹیاں) باغ،حویلی،پونچھ سدھنوتی،کوٹلی، میر پور اور بھمبرمیں پولیوگھر گھرمہم کا آغاز ہو رہا ہے جس میں پانچ سال سے کم عمر کے ہر بچے کو پولیو ویکسین کے قطرے پلائے جائیں گے۔ اس مہم کو بھر پور طریقے سے کامیاب بنانے کیلئے تمام تر ضروری انتظامات مکمل کر لئے گئے ہیں۔
ڈاکٹر سردار منظور حسین پروونشیل پروگرام منیجرای پی آئی آزاد کشمیر نے بتایا ہے کہ ریاست آزاد جموں وکشمیر گذشتہ 24 سالوں سے پولیو فری سٹیٹ ہے تا ہم اس مہم کا بنیادی مقصد یہ ہے کہ پاکستان بھر سے پولیو کا خاتمہ ہو سکے۔
لہذا اس موذی مرض سے بچاؤ کیلئے ضروری ہے کہ آزاد کشمیر میں 5 سال تک کی عمر کے تمام بچوں کو پولیو کے قطرے پلائیں جائیں۔آزادکشمیر میں پولیوکی گھر گھر مہم کے دوران 742571 بچوں کو پولیو ویکسین کے قطرے پلائے جائیں گے جس کے لئے 4058 موبائل ٹیمیں جو کہ گھر گھر جا کر بچوں کو پولیو سے بچاؤ کے قطرے پلائیں گی۔
علاوہ ازیں 450 مقام ہسپتال اور مراکز صحت (فکس سینٹرز)اور تمام اڈوں، مارکیٹوں اور داخلی راستوں پر 163 ٹرانزٹ پرائٹس بھی قائم کئے گئے ہیں۔
فکس سینٹرز، ٹرانزٹ پوائنٹس اور موبائل ٹیمیں صبح 08:00بجے سے شام 4:00 بجے تک دوران مہم مصروف عمل رہیں گے۔ اس مہم کی سپر ویژن کے لئے یونین کونسل کی سطح پر 326 یونین کونسل سپروائزر کے علاوہ 946 ایریا انچارج بھی مقرر کئے گئے ہیں جوٹیموں کی نگرانی کیساتھ ساتھ ان کو ویکسین اور دیگر ضروری سامان موقع پر فراہم کریں گے۔
ہر ضلع کے DC پولیو آفس میں پو لیوکنٹرول روم قائم کئے گئے ہیں اس کے علاوہ مرکزی سطح پروونشل پروگرام منیجرای پی آئی آزادکشمیر دفترسنٹر پلیٹ مظفرآباد میں بھی پولیو کنٹرول روم قائم کیا گیا ہے جس کا فون نمبر 920791-05822 ہے جہاں پر پولیو کی روزانہ کی کارکردگی کومانیٹرکیا جائے گا۔
اس کے علاوہ اس مہم کو WHO،فیڈرل ای پی آئی سیل اسلام آباد اور محکمہ صحت عامہ کے آفیسران مرکزی سطح سے بھی مانیٹر کریں گے۔
عوام الناس سے التماس ہے کہ پولیو گر گھر میں مامور عملہ سے بھر پور تعاون کریں اور اگر کسی وجہ سے کوئی بھی بچہ پولیو کی قطرے پینے سے محروم رہ جائے تو اپنے متعلقہ ضلعی کنٹرول روم کو مطلع کیا جائے تا کہ والدین اور عوام الناس کے باہمی روابط سے پانچ سال تک کا کوئی بچہ پولیو کے قطرے پینے سے محروم نہ ر ہے۔
ڈاکٹر سردارمنظورحسین پروگرام منیجرای پی آئی آزادکشمیر نے ریاست بھر کے والدین، اساتذہ کرام، وکلاء صاحبان، عام شہری، ملازمین، مزد ور غرض ہے کہ ہر مکتبہ فکر سے تعلق رکھنے والے احباب سے اپیل کی ہے کہ وہ گھر گھر آنے والی ٹیوں کے ساتھ بھر پور تعاون کریں اور بچوں کو پولیو سے بچاؤ کے قطرے پلانے میں اپنا مثبت کردار اداکریں تا کہ یہ قومی مہم کامیابی سے ہمکنار ہو سکے۔
یہاں یہ امربھی قابل ذکر ہے گذشتہ 24 سالوں سے آزادکشمیر پولیوفری ہے اور یہ تب ہی مکن ہوا ہے کہ حکومت آزاد کشمیر کی خصوص دلچسپی،ممبران اسمبلی، ضلعی انتظامیہ، محکمہ صحت عامہ کے آفیسران، اہلکاران، میڈیا، صحافی حضرات اور عوام الناس کا بھر پورتعاون رہا ہے۔
اگر اس طرح تمام والدین اپنے بچوں کو پولیو کے قطرے پلانے کیساتھ حفاظتی ٹیکے بھی یقینی بنائیں تو بہت جلد ملک سے پولیو اور دیگر مہلک بیماریوں کا خاتمہ ہو جائے گا۔
انہوں نے صحافی حضرات اور میڈیا سے خصوصی درخواست کی ہے کہ یہ پیغام عام لوگوں تک پہنچانے کے لئے محکمہ صحت عامہ کے ساتھ بھر پور تعاون کرتے ہوئے اس قومی فریضہ میں اپنی ملی بیداری کا ثبوت دیں تا کہ آزاد کشمیر سے پولیو جیسے موذی مرض کا مکمل خاتمہ ہو سکے۔
