اسلام آباد ( مانیٹرنگ ڈیسک ) انٹرا پارٹی الیکشن ، بلاول بھٹو پیپلز پارٹی کے چیئر مین منتخب،چوہدری شجاعت ق لیگ کے بلا مقابلہ صدر بن گئے
بلاول بھٹو زرداری انٹرا پارٹی انتخابات میں پاکستان پیپلز پارٹی کے چیئرمین منتخب ہو گئے ہیں۔
پاکستان پیپلز پارٹی کے جاری کردہ ایک بیان کے مطابق پاکستان پیپلز پارٹی کے انٹرا پارٹی انتخابات 12 اپریل 2025 کو سینٹرل سیکرٹریٹ اسلام آباد میں ہوئے۔
انتخابات میں بلاول بھٹو زرداری 4 سال کی مدت کے لیے پی پی پی کے چیئرمین، ہمایوں خان سیکرٹری جنرل، ندیم افضل چان سیکرٹری اطلاعات اور آمنہ پراچہ سیکرٹری فنانس منتخب ہو ئے ہیں۔
پی پی پی کے بیان کے مطابق پارٹی آئین کے مطابق عہدیداروں کا انتخاب 4 سال کی مدت کے لیے کیا گیا ہے۔
ادھرپاکستان مسلم لیگ ق کے انٹرا پارٹی انتخابات میں چوہدری شجاعت حسین بلا مقابلہ مسلم لیگ ق کے صدر منتخب ہوئے اور طارق حسن بلا مقابلہ سیکرٹری جنرل منتخب ہوئے۔
انٹرا پارٹی الیکشن میں چوہدری سالک حسین مسلم لیگ ق کے سینئر نائب صدر منتخب ہوئے۔
چوہدری شفیع حسین کو مسلم لیگ ق پنجاب کا جنرل سیکرٹری، ڈاکٹر محمد امجد کو مسلم لیگ ق کا چیف آرگنائزر اور غلام مصطفی ملک کو سینٹرل سیکرٹری آف انفارمیشن مقرر کیا گیا۔
یہ خبر بھی پڑھیں ۔پیپلز پارٹی آزاد کشمیر کے سینئر رہنما شیخ ارشدکا بلاول بھٹو کی قیادت پر بھرپور اعتماد کا اظہار
اجلاس میں چاروں صوبوں اسلام آباد اور گلگت بلتستان کی جنرل کونسل کے ارکان نے شرکت کی۔
جنرل کونسل کے اجلاس میں مسئلہ کشمیر اور فلسطین میں مسلمانوں کے خلاف ہونے والے مظالم کی مذمت کی گئی۔
اجلاس میں ملک میں جاری دہشت گردی کی مذمت کرتے ہوئے پاک فوج، رینجرز اور پولیس کو خراج تحسین پیش کیا گیا۔
چوہدری شجاعت نے کہا کہ قرآن ہمارا منشور ہے، آئیے ہم خدمت کی سیاست کریں، منافقت اور تکبر سے گریز کریں۔
