وزیراعظم محمد شہباز شریف کے اعزاز میں کرغزستان کے دارالحکومت بشکیک میں واقع صدارتی محل میں ایک باضابطہ اور پروقار استقبالیہ تقریب کا انعقاد کیا گیا۔ صدارتی محل پہنچنے پر وزیراعظم شہباز شریف کا ریڈ کارپٹ پر انتہائی گرمجوشی سے استقبال کیا گیا، جہاں کرغزستان کے صدر صادر نور ژاپاروف نے ان کا خود پرخلوص استقبال کیا۔
استقبالیہ تقریب کے آغاز پر پاکستان اور کرغزستان کے قومی ترانے بجائے گئے۔ بعد ازاں وزیراعظم محمد شہباز شریف کو صدارتی محل آمد پر گارڈ آف آنر پیش کیا گیا، جس کا دونوں رہنماؤں نے مل کر معائنہ کیا۔ اس موقع پر کرغزستان کی مسلح افواج کے چاق و چوبند دستے نے وزیراعظم شہباز شریف کو سلامی بھی پیش کی۔
یہ بھی پڑھیں: پاکستان 2026-27 کے لیے ایس سی او سربراہانِ مملکت کونسل کی صدارت سنبھالے گا، بشکیک اجلاس کے اعلامیے پر دستخط
وفود کا تعارف اور ملاقات:
تقریب کے دوران کرغزستان کے صدر صادر نور ژاپاروف نے وزیراعظم شہباز شریف کا اپنے سرکاری وفد کے ارکان سے تعارف کرایا۔ اس کے جواب میں وزیراعظم شہباز شریف نے بھی کرغز صدر سے اپنے ساتھ آئے ہوئے پاکستانی وفد کے ارکان کا باضابطہ تعارف کرایا۔ اس دورے کو دونوں ممالک کے دوطرفہ تعلقات کے فروغ کے لیے انتہائی اہم قرار دیا جا رہا ہے۔
