پاکستان کے معروف جاسوسی ناول نگار اشتیاق احمد کے انتہائی مقبول اور یادگار کردار انسپکٹر جمشید پر بنائی گئی فلم ’آئی جے‘ (IJ) کا پہلا ٹریلر پاکستان سمیت دنیا بھر میں ریلیز کر دیا گیا ہے۔ سسپنس، تھرل، جاسوسی اور پراسراریت سے بھرپور اس فلم میں اشتیاق احمد کے تخلیق کردہ اس منفرد کردار کو ناول کے صفحات سے نکال کر سینما کے بڑے پردے پر پیش کیا گیا ہے۔
فلم کی کہانی اشتیاق احمد کے ایک ناول کی پیچیدہ اور پراسرار کہانی پر مبنی ہے، جس میں ایک ایسے الجھے ہوئے کیس کی تفتیش دکھائی گئی ہے جس کی گتھیاں سلجھانا آسان نہیں۔
جین زی (Gen Z) کو یادگار کرداروں سے روشناس کرانے کا مقصد:
فلم کے ایگزیکٹو پروڈیوسر محمد عدنان بٹ کا کہنا ہے کہ انسپکٹر جمشید جیسے منفرد اور شاہکار کردار کو نئی نسل کے سامنے پیش کرنا اس پروجیکٹ کا بنیادی مقصد تھا۔ وہ جین زی کو ایک ایسا کردار دکھانا چاہتے ہیں جو کبھی ناول کے صفحات پر کروڑوں قارئین کا پسندیدہ تھا اور اب ڈیجیٹل دور میں ایک نئی اور عصری شکل کے ساتھ سامنے آ رہا ہے۔
فلم کے ہدایتکار فہد نور کے مطابق اصل چیلنج فلم کو صرف بڑا بنانا نہیں بلکہ یہ طے کرنا تھا کہ کہانی کا کون سا حصہ ناظرین کے سامنے لایا جائے اور کون سا راز برباد کیے بغیر برقرار رکھا جائے۔ انہوں نے بتایا کہ انسپکٹر جمشید کی کہانی کی اصل خاصیت اس کے ڈرامائی سراغ، حقیقی خطرات اور مسلسل بڑھتا ہوا سسپنس ہے۔
یہ بھی پڑھیں:سانحہ پمز کی تحقیقاتی رپورٹ وزیراعظم کو پیش، کمیٹی کے تہلکہ خیز انکشافات
نامور فنکاروں کی کاسٹ اور اہم کردار
فلم میں اہم اور مرکزی کرداروں کی کاسٹ درج ذیل ہے:
- عمیر رانا: انسپکٹر جمشید
- آصف رضا میر: خان رحمان
- احد رضا میر: بہزاد
- انوشے عباسی: مسز جمشید
- دیگر کاسٹ: فرحان طاہر، ظفر برکی اور جد حدید
خان رحمان کا کردار ادا کرنے والے آصف رضا میر نے ٹریلر کے بارے میں بتایا کہ یہ ناظرین کو تمام سوالات کے جواب دینے کے بجائے انہیں کہانی کے بارے میں مزید سوچنے پر مجبور کرتا ہے۔
عالمی سطح کی شوٹنگ اور ہالی ووڈ ایکشن ڈائریکٹر
فلم ’آئی جے‘ کی شوٹنگ متحدہ عرب امارات (UAE) کے دلکش اور جدید مقامات پر کی گئی ہے۔ فلم کے ایکشن مناظر کو عالمی شہرت یافتہ ایکشن ڈائریکٹر جارج کربی نے ڈائریکٹ کیا ہے، جو اس سے قبل مشہورِ زمانہ سیریز ’گیم آف تھرونز‘ (Game of Thrones) اور مارول (Marvel) کے انٹرنیشنل پروجیکٹس میں بھی اپنے فن کا مظاہرہ کر چکے ہیں۔
