امریکی نائب صدر جے ڈی وینس کے دورہ اسلام آباد کے لیے ان کے طیارے کا کال سائن “SAM095” رکھا گیا ہے۔ جے ڈی وینس اپنے مخصوص سی 32 اے طیارے میں اسلام آباد پہنچ رہے ہیں۔ عام طور پر جب امریکی نائب صدر خود طیارے میں سوار ہوں تو طیارے کا کال سائن “ائیر فورس 2” ہوتا ہے لیکن اسلام آباد کے اس سفر کے لیے کال سائن ‘SAM095’ استعمال کیا جا رہا ہے۔
کال سائن ‘SAM095’ دراصل ایک خصوصی فضائی مشن یعنی اسپیشل ایئر مشن (Special Air Mission) میں مصروف امریکی فضائیہ کے طیارے کی نمائندگی کرتا ہے۔ یہ کال سائن اس وقت استعمال ہوتا ہے جب طیارہ صدر یا نائب صدر کے علاوہ اعلیٰ سطح کے عہدیداروں کو لے جا رہا ہو۔ ان عہدیداروں میں کابینہ کے ارکان، سینیٹرز یا اعلیٰ سطح کے فوجی حکام شامل ہوتے ہیں۔
یہ بھی پڑھیں: اسلام آبادمذاکرات،کونسی شاہراہیں بندہونگی؟ٹریفک ڈائیورشن پلان جاری
مشن کے سیاق و سباق میں ‘SAM095’ اکثر وی آئی پی ٹرانسپورٹ سے منسلک ہوتا ہے۔ جب نائب صدر کے علاوہ دیگر اعلیٰ عہدیدار طیارے میں موجود ہوں تو پرواز “ائیر فورس ٹو” کے بجائے “SAM” کا عہدہ استعمال کرتی ہے۔ اس کے ساتھ لگا ہوا نمبر ‘095’ ایک مخصوص مشن نمبر ہے جو اس پرواز کے خاص آپریشنل پلان کو تفویض کیا گیا ہے۔ کال سائن ‘SAM095’ واضح طور پر امریکی فضائیہ کے ذریعے آپریٹ ہونے والے خصوصی سرکاری ٹرانسپورٹ مشن کی نشاندہی کرتا ہے۔
