پاکستانی سکیورٹی فورسز نے جنوبی وزیرستان کے مقابل افغانستان کے پکتیا صوبے میں واقع پانچ سرحدی پوسٹوں پر کامیاب کارروائی کر کے علاقے پر مکمل کنٹرول حاصل کر لیا ہے اور وہاں قومی پرچم لہرا دیا ہے ۔ ذرائع کے مطابق قبضے میں آنے والی پوسٹوں میں دو شوال کے مقابل، دو انگور اڈہ کے مقابل اور ایک زرملان کے مقابل شامل ہیں ۔
سرکاری ذرائع کا کہنا ہے کہ یہ کارروائی سرحدی حدود کی حفاظت، بارڈر مینجمنٹ اور علاقے میں سکیورٹی کے انتظامات کو مضبوط کرنے کیلئے کی گئی ۔ فوج نے نہ صرف ان پوسٹوں پر قبضہ کیا بلکہ انگور اڈہ کے افغانی ٹرمینل کو بھی تباہ کر دیا تاکہ سرحد پار سے ممکنہ خطرات کو مؤثر طریقے سے ختم کیا جا سکے ۔
سیکیورٹی حکام کے مطابق یہ اقدام دونوں ممالک کی سرحدی کشیدگی کے پیش نظر اور علاقائی استحکام کو یقینی بنانے کے لیے اٹھایا گیا ۔ پاک فوج کے اہلکاروں نے کارروائی کے دوران علاقے میں مکمل کنٹرول حاصل کیا اور سرحدی چوکیاں مضبوط کر دی ہیں تاکہ کسی بھی غیر قانونی نقل و حرکت یا دہشت گردانہ سرگرمی کو فوری طور پر روکا جا سکے ۔
مزید یہ بھی پڑھیں:پاک افغان سرحد باجوڑسیکٹر کے قریب بڑا ایکشن، سکیورٹی فورسز نے حملہ آور پکڑ لیا
یہ کارروائی ایسے وقت میں کی گئی ہے جب خطے میں سرحدی نگرانی اور سکیورٹی کے اقدامات کو مزید مؤثر بنانے کی ضرورت بڑھ گئی تھی ۔ حکام نے کہا کہ مستقبل میں بھی سرحدی حدود کی حفاظت کے لیے ایسے اقدامات جاری رہیں گے تاکہ دونوں ممالک کے درمیان امن اور استحکام قائم رہے ۔
سیکیورٹی ذرائع نے مزید کہا کہ اس قسم کی کارروائیاں علاقے میں دہشت گرد عناصر کی نقل و حرکت کو محدود کرنے اور مقامی عوام کی حفاظت کو یقینی بنانے میں اہم کردار ادا کرتی ہیں۔ اس موقع پر مقامی افسران اور فوجی اہلکاروں نے مل کر سرحدی چوکیوں کی نگرانی اور سخت حفاظتی اقدامات کو یقینی بنایا ہے ۔
پاکستانی فوج کا کہنا ہے کہ وہ اپنے عوام اور سرحدی حدود کے تحفظ کے لیے ہر ممکن قدم اٹھاتی رہے گی تاکہ خطے میں دیرپا امن اور استحکام قائم رہے ۔
