ریاست جموں و کشمیر کی سرزمین نہ صرف اپنی قدرتی خوبصورتی کے لیے مشہور ہے بلکہ اس نے کرکٹ کی دنیا میں بھی عالمی سطح پر اپنے بہترین کھلاڑیوں کے ذریعےاپنالوہا منوایا ہے۔ یہاں کی زرخیز زمین نے ایسے شاندارکرکٹرز پیدا کیے ہیں جنہوں نے اپنی محنت اورلگن سے عالمی کرکٹ میں اپنا ایک منفرد نام بنایا ہے۔
ہم اپنے قارئین کے لیے ان کھلاڑیوں کا تعارف پیش کر رہے ہیں جنہوں نے جموں و کشمیر کا نام کرکٹ کی دنیا میں روشن کیا اور جن کی کامیابیاں نہ صرف ان کے علاقے بلکہ پوری قوم کے لیے فخر کا باعث بنی ہیں۔
1. ہارون رشید: پاکستان ٹیسٹ کرکٹ کا ستارہ
پاکستان کے سابق ٹیسٹ کرکٹر ہارون رشید کا تعلق کشمیر سے تھا۔ انہوں نے پاکستان کی نمائندگی کرتے ہوئے 23 ٹیسٹ اور 12 ون ڈے میچز کھیلے۔ ہارون رشید کرکٹ کی دنیا میں ایک اہم شناخت رکھتے ہیں اور ان کا نام ہمیشہ کرکٹ کی تاریخ میں یاد رکھا جائے گا۔
2. حسن رضا: آزاد کشمیر کا فخر
پاکستان کے سابق ٹیسٹ کرکٹر حسن رضا کا تعلق آزاد کشمیر سے تھا۔ 1996 سے 2005 تک انہوں نے پاکستان کی انٹرنیشنل کرکٹ ٹیم کی نمائندگی کی اور اس دوران ان کی کارکردگی نے کرکٹ کے شائقین کو بہت متاثر کیا۔
3. معین علی: برطانوی کرکٹ کا ایک اہم نام
برطانوی کرکٹ ٹیم کے سابق کھلاڑی معین علی کا تعلق ریاست جموں و کشمیر کے ڈڈیال علاقے سے ہے۔ معین علی نے انگلینڈ کی طرف سے 68 ٹیسٹ، 138 ون ڈے اور 92 ٹی ٹوئنٹی میچز کھیلے ہیں۔ اس کے علاوہ انہوں نے کچھ میچز میں برطانوی کرکٹ ٹیم کی قیادت بھی کی۔
4. سریش رائنا: بھارتی کرکٹ کا جگمگاتا ستارہ
سابق بھارتی کرکٹر سریش رائنا کی پیدائش جموں و کشمیر کے سرینگر کے قریب رینا واری گاؤں میں ہوئی۔ ان کی کرکٹ کی مہارت نے بھارت کی ٹیم کو عالمی سطح پر کئی کامیابیاں دلائیں۔ رائنا کا شمار بھارتی کرکٹ کے عظیم کھلاڑیوں میں کیا جاتا ہے۔
5. سفیان مقیم: پاکستان کا اُبھرتا ہوا اسٹار
پاکستان کے ابھرتے ہوئے کرکٹر سفیان مقیم کا تعلق آزاد کشمیر کے سدھنوتی علاقے سے ہے۔ سفیان نے پاکستان کی جانب سے ون ڈے اور ٹی 20 میچز میں اپنی صلاحیتوں کا مظاہرہ کیا اور مستقبل میں مزید کامیابیاں حاصل کرنے کی پوری توقعات ہیں۔
6. سلمان ارشاد: فاسٹ باؤلنگ کی نئی امید
پاکستان کے فاسٹ باؤلر سلمان ارشاد 3 دسمبر 1995 کو آزاد کشمیر کے راولاکوٹ میں پیدا ہوئے۔ انہوں نے پاکستان سپر لیگ سمیت مختلف انٹرنیشنل کرکٹ لیگز میں اپنے کھیل کا لوہا منوایا ہے۔ سلمان ارشاد کی تیز باؤلنگ ان کی شہرت کی وجہ ہے۔
7. مہران ممتاز: سپن باؤلنگ کے لیےنیا چہرہ
ابھرتے ہوئے سپنر مہران ممتاز کا تعلق آزاد کشمیر کے کہوٹہ علاقے سے ہے۔ انہوں نے پاکستان سپر لیگ میں اپنی باؤلنگ کی مہارت کا بھرپور مظاہرہ کیا اور ان کی کارکردگی نے کرکٹ شائقین کو متوجہ کیا۔
8. زمان خان: آزاد کشمیر کا فاسٹ باؤلر
پاکستان سپر لیگ کے کھلاڑی زمان خان کا تعلق آزاد کشمیر کے چکسواری علاقے سے ہے۔ ان کے والدین کا تعلق پاکستان کے قبائلی علاقوں سے ہے۔ زمان نے اپنی کرکٹ کی ابتدائی تربیت میرپور آزاد کشمیر میں حاصل کی اور اب وہ لاہور قلندر کی ٹیم کی نمائندگی کر رہے ہیں۔
9. عمران ملک: بھارت کا تیز باؤلر
22 نومبر 1999 کو پیدا ہونے والے بھارت کے فاسٹ باؤلر عمران ملک کا تعلق ریاست جموں و کشمیر کے گجر نگر علاقے سے ہے۔ عمران نے بھارت کی جانب سے متعدد انٹرنیشنل میچز میں شرکت کی ہے اور ان کی تیز باؤلنگ نے ان کو عالمی سطح پر ایک ممتاز کرکٹر بنادیا ہے۔
10. نتالیہ پرویز: قومی کرکٹ ٹیم کی وومن اسٹار
آزاد کشمیر کے ضلع بھمبر کی رہائشی نتالیہ پرویز نے پاکستان کی وومن کرکٹ ٹیم میں اپنی صلاحیتوں کا بھرپور مظاہرہ کیا ہے۔ ان کی محنت اور عزم نے انہیں قومی کرکٹرز کی صف میں شامل کر دیا ہے۔
جموں و کشمیر کے ان کرکٹرز نے نہ صرف اپنی سرزمین کا نام روشن کیا بلکہ عالمی کرکٹ کے میدان میں اپنی بے مثال کارکردگی سے ایک نئی تاریخ رقم کی۔ ان کی محنت، عزم اور حوصلہ بتاتا ہے کہ کامیابی کا راستہ ہمیشہ محنت اور لگن سے ہو کر گزرتا ہےاور یہ کھلاڑی اس بات کی جیتی جاگتی مثال ہیں کہ خواب سچ ہو سکتے ہیں اگر دل میں جیت کا جذبہ ہو۔
